សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ ជនសង្ស័យម្នាក់ ក្នុងចំណោមបក្ខពួក២នាក់ត្រូវបានកម្លាំងសមត្ថកិច្ចស្រុកគិរីវង់ ធ្វើការឃាត់ខ្លួនខណៈពេលដែលពួកគេបង្រុងនាំយកកញ្ឆា២៤គីឡូក្រាមយកទៅលក់នៅប្រទេសវៀងណាម ដែលហេតុការណ៍នេះកើតឡើងកាលពីវេលាម៉ោង១៩និង៣០នាទី ថ្ងៃព្រហស្បតិ៍ ៤រោច ខែមិគសិរ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៧ ខែធ្នូ ឆ្នាំ២០១៧នៅចំណុចភូមិចំបកទឹម ឃុំគិរីចុងកោះ ស្រុកគិរីវង់ ខេត្តតាកែវ។
យោងតាមរបាយការណ៍របស់អធិការដ្ឋាននគរបាលស្រុកគិរីវង់ បានឲ្យដឹងថា ដោយក្តាប់បានពត៌មានលើមុខសញ្ញាដឹកកញ្ឆាក្រៀមឆ្លងដែនខុសច្បាប់ ទៅប្រទេសវៀតណាម កម្លាំងជំនាញនៃអធិការដ្ឋាននគរបាលស្រុកគិរីវង់ បានរៀបចំកម្លាំងពួនស្ទាក់នៅចំណុចខាងលើរហូតឈានដល់ឃាត់បានមុខសញ្ញា០១នាក់ ចំណែកបក្សពួក០១នាក់ទៀតរត់គេចខ្លួនបាត់ ។
ជនសង្ស័យមានឈ្មោះ អោក ធិនដាវីន ភេទប្រុស អាយុ១៧ឆ្នាំ ទីលំនៅភូមិជ្រោយ ឃុំព្រះបាទជាន់ជុំ ស្រុកគិរីវង់ ខេត្តតាកែវ។
ក្រោយពេលឃាត់ខ្លួនបានជនសង្ស័យខាងលើ កម្លាំងសមត្ថកិច្ចដកហូតបានកញ្ឆាក្រៀមមានទម្ងន់២៤គីឡូក្រាមម៉ូតូ០១គ្រឿង។
បច្ចុប្បន្នជនសង្ស័យ និងវត្ថុតាងកម្លាំងជំនាញកំពុងកសាងសំណុំរឿងដើម្បីបញ្ជូនទៅសាលាដំបូងខេត្តចាត់ការតាមនីតិវិធី និងស្រាវជ្រាវស្វែងរកមេក្លោងធំដើម្បីយកមកផ្តន្ទាទោសតាមច្បាប់ ៕ ភ្នំដា
