សារព័ត៌មាន នគរវត្ត តែងតែនាំមុខគេជានិច្ច
ភាពតានតឹងនៅឧបទ្វីបកូរ៉េ បានបង្កក្តីបារម្ភយ៉ាងខ្លាំងដល់ប្រទេសជិតខាង ពិសេសគឺកូរ៉េខាងត្បូង និងជប៉ុន ដែលជាគោលដៅវាយប្រហាររបស់កូរ៉េខាងជើង ដោយសារតែនៅទីនោះមានទាហានអាមេរិកឈរជើងនៅទីនោះ។ ចំណុចទាំងនោះហើយ បានជាកូរ៉េខាងត្បូងបង្កើនការទិញអាវុធដើម្បីការពារខ្លួន ។
កន្លងមកថ្មីៗជប៉ុនក៏បាន ឡើងគម្រោងទិញមីស៊ីល ការពារដ៏ទំនើប ទប់ស្កាត់ការគំរាមកំហែងពីទីក្រុងព្យុងយ៉ាង។ ជប៉ុន គឺជាប្រទេសដែលមីស៊ីលកូរ៉េខាងជើង ហោះឆ្លងកាត់រយៈពេល៣លើកមកហើយ ដោយការសាកល្បងមីស៊ីលឆ្លងទ្វីបរបស់កូរ៉េខាងជើង។
រដ្ឋមន្ត្រីក្រសួងការពារជាតិជប៉ុន កាលពីថ្ងៃទី៨ ខែធ្នូ បានប្រកាសថា ជប៉ុនគ្រោងនឹងទិញមីស៊ីល រយៈចម្ងាយឆ្ងាយ និងមធ្យមដើម្បីការពារខ្លួនទល់នឹងការគំរាមកំហែងយោធារបស់កូរ៉េខាងជើង។ ប៉ុន្តែគម្រោងទិញអាវុធបែបនេះ អាចនឹងត្រូវបំផុសចំណោទស្តីអំពីនយោបាយសន្តិនិយមរបស់ប្រទេស។
មីស៊ីលដែលជប៉ុនមានគម្រោងទិញនេះ ជាប្រភេទមីស៊ីលបណ្តែត (មីស៊ីលការពារខ្លួន) Jassm និង Lrasm របស់អាមេរិក ដែលអាចបាញ់បានចម្ងាយដល់ទៅ៩រយគីឡូម៉ែត្រ និង មីស៊ីល Joint Strikes របស់ក្រុមហ៊ុនន័រវែស Kongsberg Defence and Aerospace ដែលអាចបាញ់បានចម្ងាយ៥រយគីឡូម៉ែត្រ។ នេះបើតាមប្រភពសារព័ត៌មានជប៉ុន។
ដើម្បីអាចទិញមីស៊ីលរយៈឆ្ងាយ និងមធ្យមនេះមកបំពាក់ឲ្យយន្តហោះចំបាំងរបស់ខ្លួន រដ្ឋមន្ត្រីក្រសួងការពារជាតិជប៉ុន នឹងទៅស្នើសុំថវិកាពិសេសពីរដ្ឋាភិបាល ដោយពន្យល់ថា មីស៊ីលនេះនឹងអនុញ្ញាតឲ្យជប៉ុនអាចប្រឈមទប់ទល់នឹងគូសត្រូវបាន ពីគ្រប់ទិសទីទាំងអស់។
ប៉ុន្តែគម្រោងទិញអាវុធមីស៊ីល អាចនឹងបំផុសឲ្យមានភាពចម្រូងចម្រាស ព្រោះជប៉ុនមានរដ្ឋធម្មនុញ្ញសន្តិនិយម ប្រកាន់យកនយោបាយការពារខ្លួន និងហាមឃាត់ដាច់ខាតមិនឲ្យប្រើប្រាស់កម្លាំងយោធាជាដំណោះស្រាយវិវាទជាមួយអន្តរជាតិ។ ជប៉ុនរំពឹងតែលើសហរដ្ឋអាមេរិកក្នុងការពារប្រទេស ស្របតាមសន្ធិសញ្ញាចងសម្ព័ន្ធភាពជប៉ុន-អាមេរិកផ្នែកសន្តិសុខ។
មួយរយៈចុងក្រោយនេះ ជប៉ុនមានអារម្មណ៍ថារងការគំរាមកំហែងខ្លាំងឡើងៗ ពីសំណាក់កូរ៉េខាងជើង។ ព្រឹទ្ធសភាជប៉ុន បានចាត់ទុកការបាញ់សាកល្បងមីស៊ីលអន្តរទ្វីប កាលពីថ្ងៃទី ២៩ វិច្ឆិកា ២០១៧ របស់ព្យុងយ៉ាង ដែលធ្លាក់ក្នុងសមុទ្ទជប៉ុន គឺជាការគំរាមកំហែងពិតសម្រាប់ជប៉ុន។ ចំណែកលោកស៊ីនហ្សូ អាបេ បានប្រកាសថា ការចរចាជាមួយព្យុងយ៉ាងលែងមានន័យហើយ។ សេចក្តីអំពាវនាវរបស់អាមេរិក កាលពីសប្តាហ៍មុន ឲ្យសហគមន៍អន្តរជាតិផ្តាច់ទំនាក់ទំនងពាណិជ្ជកម្ម និងការទូតជាមួយកូរ៉េខាងជើង ដើម្បីបង្ខំរបបនេះឲ្យបោះបង់មហិច្ឆតានុយក្លេអ៊ែរ តែត្រូវម៉ូស្គូ និងប៉េកាំងច្រានចោល៕ ម៉ែវ សាធី
A group of Polish Air Force pilots stand next to a F-16 fighter jet and a model of a JASSM missile as they attend a contract signing ceremony of 40 Lockheed Martins joint air-to-surface standoff missiles (JASSM), as well as F-16 fighter plane operational flight plan upgrades, associated equipment, parts, training and logistical support, between Poland and U.S., at a Polish Air Force base in Poznan, Poland, Thursday, Dec. 11, 2014. (AP Photo/Alik Keplicz)
