សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ បុរស២នាក់បានរងរបួសធ្ងន់ ដោយសារតែករណីគ្រោះថ្នាក់ចរាចរណ៏រវាងម៉ូតូបុកគ្នាកាលពីវេលាម៉ោងរំលោងអធ្រាត្រឈានចូលថ្ងៃចន្ទ ៨រោច ខែមិគសិរ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១១ ខែ ឆ្នូ ឆ្នាំ២០១៧ នៅត្រង់ចំណុចលើផ្លូវជាតិលេខ១គីឡូម៉ែត្រលេខ138-139 ស្ថិតក្នុងភូមិ ប្រសូត្រ២ ឃុំ កណ្តៀងរាយ ស្រុកស្វាយទាប ខេត្ត ស្វាយរៀង។
បើតាមប្រភពពីសមត្ថកិច្ចនគរបាលស្រុកបានឲ្យដឹងថា ៖ នៅមុនពេលកើតហេតុគេឃើញយុវជនម្នាក់សេង ពៅ អាយុ២៥ឆ្នាំ ជនជាតិខ្មែរ មុខរបរ កសិករ មានទីលំនៅ ភូមិរោងបន្លែ សង្កាត់ស្វាយរៀង ក្រុងស្វាយរៀង បានជិះម៉ូតូម៉ាក ហុងដាឌ្រីម ស៊េរីឆ្នាំ 2015 ពណ៌ខ្មៅ ស្លាកលេខ ភ្នំពេញ 1DD 5522 ដោយធ្វើដំណើរពី ទិសដៅពីកើតទៅលិចលុះមកដល់ចំណុចកើតហេតុខាងលើ ក៏រេចង្កូតទៅខាងឆ្វេងដៃ ស្របពេលនោះក៏មានម៉ូតូមួយគ្រឿងទៀតម៉ាក ហុងដាឌ្រីម ស៊េរីឆ្នាំ 2017 ពណ៌ខ្មៅ ស្លាកលេខ ព្រៃវែង 1J 8989 បើកបរដោយឈ្មោះ ភាន សំអាន អាយុ 27ឆ្នាំ ជនជាតិខ្មែរ មុខរបរ កម្មករសំណង់ មានទីលំនៅ រាជធានីភ្នំពេញពីលិចទៅកើតបញ្រាស់គ្នាក៏បុកគ្នាពេញទំហឹងតែម្តង។
ក្រោយមកអ្នកភូមិបានរាយការណ៏មកសមត្ថកិច្ចនគរបាលមូលដ្ឋានមកអន្តរាគមន៏ដឹកភាគីទាំង២នាក់មកកាន់មន្ទីរពេទ្យស្រុកស្វាយទាប។
ចំណែកមធ្យោបាយទាំង០២គ្រឿង ត្រូវបានសមត្ថកិច្ចជំនាញយកមករក្សាទុកនៅអធិការដ្ឋាននគរបាលស្រុកដើម្បីកសាងសំណុំរឿងតាមច្បាប់៕ យឹម សុថាន
