សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មនុស្ស៣នាក់រងរបួសធ្ងន់ ដោយសាររថយន្តបើកបុកម៉ូតូរ៉ឺម៉កដឹកអេតចាយ ខ្ទាតផ្លោងធ្លាក់ទឹកប្រឡាយ ហើយរថយន្តបង្កបើកគេចទៅបាត់ កាលពីវេលាម៉ោង២និង១៥នាទីអធ្រាត្រ ឈានចូលថ្ងៃទី១០ ខែធ្នូ ឆ្នាំ២០១៧ ត្រូវនិងថ្ងៃ៧រោច ខែមគិសិរ ឆ្នាំរកា នព្វស័ក ព.ស២៥៦១ ត្តាមផ្លូវជាតិលេខ៤ មុខវត្តកំបូល ភូមិព្រៃបឹង សង្កាត់កន្ទោក ខណ្ឌពោធិសែនជ័យ ។
តាមប្រភពនៅកន្លែងកើតហេតុ បានឲ្យដឹងថា មុនកើតហេតុ ម៉ូតូរ៉ឺម៉ក ដឹកអេតចាយសំពីងសំពោង គ្មានភ្លើងសញ្ញាពីក្រោយ បើកពីកើតទៅលិច លុះដល់ចំណុចកើតហេតុ មានរថយន្តមួយគ្រឿងមិនចាំម៉ាក បើកល្បឿនលឿនពីកើតទៅលិចស្របទិសគ្នា ជ្រុលទៅបុករុញពីក្រោយ ផ្លោងធ្លាក់ទឹកប្រឡាយ រងរបួសធ្ងន់២នាក់ ស្រាលម្នាក់ ដាច់ធ្លាក់បាវអេតចាយ រាយប៉ាយតាមផ្លូវ ចំណែករថយន្តបើករត់គេចទៅបាត់ ។
ជនរងគ្រោះទាំង៣នាក់ ត្រូវបានរថយន្តគ្លីនិកសុភារិទ្ធដឹកយកទៅព្យាបាល ចំណែកម៉ូតូរ៉ឺម៉កត្រូវបាននគរបាលយកទៅរក្សាទុកនៅប៉ុស្តិ៍ ជាបណ្តោះអាសន្ន ៕ សុខាសែនជ័យ
