សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ប្រជាពលរដ្ឋប្រទះឃើញម៉ូតូហុងដាឌ្រីមស៊េរីឆ្នាំ២០១៧ ពណ៌ខ្មៅមួយគ្រឿងនៅប្លុងចោល នៅចំណុចផ្លូវស្ងាត់៦០ម៉ែត្រ ភូមិបាគូ សង្កាត់ដង្កោ ខណ្ឌដង្កោ កាលពីវេលាម៉ោង០៧និង៤០នាទីយប់ ថ្ងៃអង្គារ ៩រោច ខែមិគសិរ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី១២ ខែធ្នូ ឆ្នាំ២០១៧ ហើយក៏បានឮដល់សមត្ថកិច្ចមូលដ្ឋានបានចុះទៅដល់ ទើបដឹងថាម៉ូតូនេះត្រូវបានជនសង្ស័យប្លន់យកពីខេត្តកណ្ដាល មកប្លុងចោលសោះ ។
ម៉ូតូត្រូវបានគេប្រទះឃើញនោះម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ កណ្ដាល ១W-៤៣៤៨ ។
តាមសម្តីសមត្ថកិច្ចខណ្ឌដង្កោបានឲ្យដឹងថា មុននឹងប្រទះឃើញម៉ូតូមួយគ្រឿងនៅចំណុចខាងលើនេះ គឺមានប្រជាពលរដ្ឋម្នាក់ជាអ្នកបើករថយន្តកុងតឺន័រ បានបើករថយន្តមកឈប់នៅកន្លែងកើតហេតុ រួចហើយបានចុះពីលើរថយន្ត ក៏ស្រាប់តែប្រទះឃើញម៉ូតូមួយគ្រឿង បានប្លុងចោលកៀនស្មៅ ហើយកន្លែងងងឹតទៀត ដោយឃើញបែបនេះប្រជាពលរដ្ឋរូបនោះ បានរាយការណ៍ទៅសមត្ថកិច្ចមូលដ្ឋានឲ្យចុះមកមើលកន្លែងកើតហេតុតែម្តង ។
ប្រភពដដែលបានបន្តទៀតថា បន្ទាប់ពីសមត្ថកិច្ចបានចុះទៅដល់កន្លែងកើតហេតុ បានមើលភិនភាគម៉ូតូឃើញថា ម៉ូតូជាម៉ូតូដែលជនសង្ស័យបានធ្វើសកម្មភាពប្លន់យកពីបុរសម្នាក់នៅស្រុកកណ្ដាលស្ទឹង ខេត្តកណ្ដាល ហើយជនជនសង្ស័យបានជិះរត់គេចខ្លួនចូលមកភ្នំពេញ តែដោយសារតែម៉ូតូដែលជនសង្ស័យប្លន់បានជិះមកដល់ចំណុចកើតហេតុ ធ្វើឲ្យម៉ូតូបាក់ខ្នងកង់ក្រោយជិះទៅមុខលែងរួច ទើបជនសង្ស័យប្លុងចោលបែបនេះទៅ ។
ក្រោយពេលកើតហេតុ ម៉ូតូត្រូវបានសមត្ថកិច្ចយកទៅរក្សាទុកនៅអធិការដ្ឋានខណ្ឌដង្កោ ដើម្បីរង់ចាំប្រគល់ឲ្យម្ចាស់វិញ ៕ ភារ៉ា ដង្កោ
