សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ករណីគ្រោះថ្នាក់ចរាចរមួយបានកើតឡើងរវាងម៉ូតូនិងរថយន្តស៊េរីទំនើបមួយគ្រឿង បណ្ដាលឲ្យរងការខូចខាតទាំងសងខាង ខណះដែលស្រីស្អាត២នាក់ រួមដំណើរជាមួយបុរសម្នាក់ បានបើករថយន្តម៉ាស្តា ពាក់ស្លាកលេខ ភ្នំពេញ 2AC-7117 បត់ខ្វះការប្រុងប្រយ័ត្ន ក៏ត្រូវបុរសម្នាក់បើកម៉ូតូមួយគ្រឿងម៉ាកហុងដា PCX បើកបរក្នុងល្បឿនលឿន ជ្រុលទៅបុករថយន្តចំពីមុខយ៉ាងពេញទំហឹង សំណាងល្អមិនមានអ្នករងរបួសធ្ងន់ ។
ហេតុការណ៍គ្រោះថ្នាក់ចរាចរខាងលើនេះ បានកើតឡើងកាលពីវេលាម៉ោង៨និង៣០នាទីយប់ថ្ងៃព្រហស្បតិ៍ ១១រោច ខែ មិគសិរ ឆ្នាំរកា នព្វស័ក ព.ស.២៥៦១ ត្រូវនឹង ថ្ងៃទី១៤ ខែធ្នូ ឆ្នាំ២០១៧ ស្ថិតនៅតាមបណ្តោយផ្លូវព្រះនរោត្តម ទល់មុខ វិទ្យាស្ថានបញ្ញាសាស្រ្ត សង្កាត់ទន្លេបាសាក់ ខណ្ឌចំការមន ។
ប្រភពព័ត៌មានពីសាក្សីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តស៊េរីទំនើបមួយគ្រឿង ម៉ាកម៉ាស្តា ពណ៌ក្រហម ពាក់ស្លាកលេខ ភ្នំពេញ 2AC-7117 បើកបរដោយនារីស្រស់ស្អាតម្នាក់និងរួមដំណើរជាមួយប្រុសស្រី២នាក់ទៀត តាមបណ្តោយផ្លូវព្រះនរោត្តម ក្នុងទិសដៅពីជើងទៅត្បូង លុះដល់ចំណុចកើតហេតុបានបត់ឆ្លងផ្លូវទៅកើត ស្រាប់តែត្រូវម៉ូតូមួយគ្រឿងម៉ាកហុងដាPCX ពណ៌ស ពាក់ស្លាកលេខ ភ្នំពេញ 1GJ-2995 បើកបរដោយបុរសម្នាក់បញ្ច្រាសទិសដៅគ្នា ក៏រ៉េចង្កូតទៅបុករថយន្តម៉ាស្តារងការខូចខាតផ្នែកខាងឆ្វេង ចំហៀងខាងមុខរថយន្តយ៉ាងដំណំ តែសំណាងល្អម្ចាស់ម៉ូតូរងរបួសស្រាល ។
ក្រោយពេលកើតហេតុគេឃើញនគរបាលមូលដ្ឋាន ចុះមកដល់ធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោក ដើម្បីរង់ចាំដោះស្រាយទៅតាមនីតិវិធី ៕ស រស្មី
