សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ព្រឹកថ្ងៃទី១៩ ខែ ធ្នូ ឆ្នាំ ២០១៧ នៅសាលា ប៊ែលធី អន្តរជាតិ បានប្រារព្ធពិធីប្រគល់ប័ណ្ណធានារ៉ាប់រងរបស់ក្រុមហ៊ុនហ្វតតេ ជូនដល់សិស្សថ្នាក់ទី៩ ដល់ទី១២ក្រោមអធិបតីភាពរបស់លោក លី ប៊ុនឆៃ អគ្គនាយករង ប៊ែលធីគ្រុប និងជាប្រធានគណៈគ្រប់គ្រងនាយកសាខា និងលោក យក់ ចំរើនឫទ្ធិ អគ្គនាយក ក្រុមហ៊ុនធានារ៉ាប់រងហ្វតតេ។
តាមរបាយការណ៍លោក ប៊ុត ឌីម៉ង់ ប្រធានការិយាល័យចំណេះទូទៅ បានអោយដឹងថា៖ បច្ចុប្បន្ននេះ សាលា ប៊ែលធី អន្តរជាតិ មាន២១ សាខា ក្នុងនោះ ១៨សាខា កំពុងដំណើរការ និង០៣សាខា កំពុងសាងសង់ ដែលមានសិស្សកំពុងសិក្សា ជាង៣៥.០០០នាក់។ សាលា ក៏បានបង្កើត កម្មវិធីសិក្សាបន្ថែមធំៗ ចំនួន ៨ សម្រាប់ថ្នាក់ចំណេះទូទៅ និង ភាសាអង់គ្លេស រួមមាន៖ ទី១.កម្មវិធីបង្កើនចំណេះដឹងទូទៅទី២.កម្មវិធីពង្រឹងស្មារតី ទី៣.កម្មវិធី ទស្សនកិច្ចសិក្សា ទី៤.កម្មវិធិសិក្សាតាមទូរទស្សន៍ ទី៥.កម្មវិធីប្រឡងសំណេរ ទី៦.កម្មវិធីប្រកួតប្រជែងគណិតវិទ្យា ទី៧.កម្មវិធីប្រកួតប្រជែង ទេពកោសល្យ និងទី៨.កម្មវិធីកីឡា ហើយក្នុងឆ្នាំសិក្សានេះ សាលាកំណត់យក ថ្នាក់វិទ្យាសាស្ត្រ ស្របតាមកម្មវិធីស្តែម (STEM: Science, Technology, Engineering, Mathematics) របស់ក្រសួងអប់រំ និងបង្កើតបន្ទប់ពិសោធន៍ (Laboratory) សម្រាប់ថ្នាក់ទី៧-១២ លើមុខវិជ្ជា៖ រូបវិទ្យា គីមីវិទ្យា និង ជីវវិទ្យា។ សាលាក៏បានបន្តបើកថ្នាក់បំប៉នបន្ថែម និងថ្នាក់ពិសេស សម្រាប់សិស្សថ្នាក់ទី៩ និងទី១២ផងដែរ។
ក្នុងឱកាសនោះដែរ លោក លី ប៊ុនឆៃ អគ្គនាយករង ប៊ែលធីគ្រុប បានមានប្រសាសន៍ថា៖ សាលា បានសម្រេចផ្តល់ជូនប័ណ្ណធានារ៉ាប់រង គ្រោះថ្នាក់បុគ្គល របស់ក្រុមហ៊ុនហ្វតតេ ជូនដល់សិស្សានុសិស្ស ថ្នាក់ទី៩ ដល់ ទី១២ ដើម្បីជាការលើកទឹកចិត្ត និងការព្រួយបារម្ភ ពីសុវត្ថិភាពរបស់សិស្ស។ ប័ណ្ណធានារ៉ាប់រងនេះ នឹងជួយកាត់បន្ថយលើការចំណាយព្យាបាលរបួស ក្នុងករណីមានគ្រោះថ្នាក់ ដែលកើតឡើង ២៤ម៉ោង លើ២៤ម៉ោង រយៈពេល ១ឆ្នាំ។ បន្ថែមលើនេះទៀត ការធានារ៉ាប់រងនេះ ក៏បានជួយដោះស្រាយលើគ្រោះថ្នាក់ផ្សេងៗទៀត ដូចជាៈ ពេលធ្វើដំណើរ លក្ខខណ្ឌនៃការបាត់ខ្លួន ពស់ចឹក និង សត្វលិ្អតទិច ឬ ខាំ ព្រមទាំង ពិការភាព មរណភាព និង ថ្លៃបុណ្យសពទៀតផង។
លោក លី ប៊ុនឆៃ បានបន្ថែមទៀតថា កន្លងមក ប៊ែលធី គ្រុប ក៏បានយកចិត្តទុកដាក់លើហានិភ័យការងាររបស់បុគ្គលិកទាំងអស់ ដោយបានផ្តល់ជូន នូវប័ណ្ណធានារ៉ាប់រង របស់ក្រុមហ៊ុនហ្វតតេ ជូនដល់បុគ្គលិក និងលោកគ្រូ-អ្នកគ្រូ ដែលបម្រើការនៅប៊ែលធី ចាប់ពី ៣ឆ្នាំឡើងទៅ ដើម្បីជាការលើកទឹកចិត្តដល់ពួកគាត់ ដែលបានខិតខំប្រឹងប្រែងបំពេញភារកិច្ចរបស់ខ្លួនបានល្អ ដោយមិនមានការព្រួយបារម្ភ ពីការចំណាយលើថ្លៃព្យាបាល ក្នុងករណីមានគ្រោះថ្នាក់ផ្សេងៗណាមួយ និង ស្របតាមគតិបណ្ឌិត របស់ប៊ែលធី គ្រុបគឺ “សុខភាពរបស់បុគ្គលិក គឺជាទ្រព្យសម្បត្តិរបស់ក្រុមហ៊ុន” ។
បន្ទាប់មក លោក យក់ ចំរើនឫទ្ធិ អគ្គនាយក ក្រុមហ៊ុនធានារ៉ាប់រងហ្វតតេ ក៏បានថ្លែងអំណរគុណចំពោះ ប៊ែលធី ដែលមានជំនឿទុកចិត្តលើក្រុមហ៊ុនហ្វតតេ។ ក្រុមហ៊ុន នឹងបន្តការខិតខំផ្តល់ជូនការធានារ៉ាប់រងនេះ ឲ្យកាន់តែប្រសើរថែមទៀត។
ជាទីបញ្ចប់ ប្រធានគណៈអធិបតី បានប្រគល់ប័ណ្ណធានារ៉ាប់រងរបស់ក្រុមហ៊ុនហ្វតតេជូនដល់សិស្សថ្នាក់ទី៩ ដល់ទី១២ នាពេលនោះផងដែរ៕ សរស្មី
