ចាងហ្វាងកាសែតស្នេហាជាតិ​ សាន្ត​ ប៊ុនធឿន​ ត្រូវ​ ប្រធាន​ LDP ប្តឹងពីបទគំរាមសម្លាប់

ភ្នំពេញ៖ចាងហ្វាងកាសែតស្នេហាជាតិ​លោក​ សាន្ត​ ប៊ុនធឿន​ ដែលមជ្ឈដ្ឋានមួយចំនួនផ្តល់រហស្សនាម”ជួបផឹក”នោះ​ ឥឡូវប្រឈមបណ្តឹងព្រហ្មទណ្ឌចូលអយ្យការអមសាលាដំបូងរាជធានីភ្នំពេញ​ ហើយ​ ដែលប្តឹងដោយលោក​ ខឹម​ វាសនា​ ប្រធានគណបក្សសម្ព័ន្ធដើម្បីប្រជាធិបតេយ្យ​ LDP ចោទប្រកាន់ពីបទ”គំរាមកំហែងថានឹងសម្លាប់”។ បច្ចុប្បន្ន​ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ​ កំពុងចាត់ការបណ្តឹងនេះ។

ក្នុងការផ្សាយផ្ទាល់តាមហ្វេសប៊ុក​ លោក​ សាន្ត​ ប៊ុនធឿន​ និយាយថា លោកមិនភ័យព្រួយ ចំពោះបណ្តឹងនេះទេ ព្រោះលោកមានក្រុមមេធាវី មានខ្នង និង វាមិនមាន ហេតុផលអ្វីទៅចោទប្រកាន់ លោកបានទេ ព្រោះលោក និយាយ គំរាម ក្នុងពេលស្រវឹង ហើយក៏គ្មានអាវុធណាទៅ សម្លាប់ប្រធានគណបក្សរូបនេះដែរ ។

លោក សាន្ត ប៊ុនធឿន ដែលតែងតែឃើញនៅជាមួយ កំប៉ុងស្រាបៀ ABC នោះ ថែមទាំង អួតទៀតថា ត្រឹម ធី សុវណ្ណថា លោកមិនខ្លាចផងរឿងអីទៅភ័យរឿង LDP ប្តឹង និង ថាយកល្អឱ្យ​ ABC ទឹកត្រឡាច និង មាន់ស្រែមកទើប លោកឈប់ជេរ LDP ។

ក្នុងពាក្យបណ្តឹង​ ចុះថ្ងៃទី១៨​ ខែធ្នូ​ ឆ្នាំ២០១៧​ លោក​ ខឹម​ វាសនា​ និយាយថា​ លោកចាងហ្វាងកាសែតរូបនេះ ផឹកស្រាឡាយវីដេអូ ជេរប្រមាថ និងគំរាមសម្លាប់ ប្រធានគណបក្សសម្ព័ន្ធដើម្បី ប្រជាធិបតេយ្យ គឺ លោក ខឹម វាសនា ដោយ និយាយថា “រូបគេនឹងសម្លាប់ លោកខឹម វាសនា ឱ្យទាល់តែបាន បើទោះបីជា ត្រូវជាប់គុក ប៉ុន្មានឆ្នាំក៏ដោយ “។

ការនិយាយគំរាមសម្លាប់ លោក ខឹម វាសនា យ៉ាងគគ្លើន បែបនេះ បានធ្វើឱ្យ អ្នកគាំទ្រលោក ខឹម វាសនា ជាច្រើន ខឹងសម្បារយ៉ាងខ្លាំង ៕ ចេស្តា