សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ The voice KTV ក្រុងតាខ្មៅ ត្រូវបានជនសង្ស័យក្នុងអំពើឆក់កាបូបម្នាក់ បកអាក្រាតថា បានអនុញ្ញាតឲ្យយុវជនសេពគ្រឿងញៀន ។ ពលរដ្ឋក្នុងមូលដ្ឋាន សំណូមពរ អាជ្ញាធរបង្ក្រាបទីតាំងល្មើសច្បាប់នេះផង ។ អធិការនគរបាលក្រុងតាខ្មៅ លោក ស កែវពិសិដ្ឋ ថានឹងពិនិត្យករណីនេះ ។
ជនសង្ស័យម្នាក់ក្នុងចំណោមពីរនាក់ ត្រូវបានប្រជាពលរដ្ឋឃាត់ខ្លួនប្រគល់ឲ្យសមត្ថកិច្ច ក្រោយឆក់កាបូបពីស្ត្រីម្នាក់ កាលពីយប់ថ្ងៃព្រហស្បតិ៍ ៤កើត ខែបុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២១ ខែធ្នូ ឆ្នាំ ២០១៧ នៅចំណុចភូមិព្រែកសំរោង សង្កាត់តាខ្មៅ ក្រុងតាខ្មៅ ។
លោកវរសេនីយ៍ ស កែវពិសិដ្ឋ អធិការនគរបាលក្រុងតាខ្មៅ ថ្លែងថា ជនសង្ស័យមានគ្នាពីរនាក់ ម្នាក់ឈ្មោះរី ដារ៉ូ ភេទប្រុស អាយុ១៦ឆ្នាំ និងម្នាក់ទៀតរត់គេចខ្លួន ។ ជនរងគ្រោះឈ្មោះ យូ សុខគង់ ភេទស្រី អាយុ៣៨ឆ្នាំ ។
ជនសង្ស័យ សារភាពថា គេបានទិញគ្រឿងញៀនពីចាក់អង្រែលើ ខណ្ឌមានជ័យ ក្នុងតម្លៃ១០ដុល្លារ យកទៅប្រើប្រាស់នៅ The voice KTV ផ្លូវលេខ១១០ ភូមិថ្មី សង្កាត់តាខ្មៅ ក្រុងតាខ្មៅ ។ ជនសង្ស័យ និយាយថា យុវជនភាគច្រើនទៅប្រើប្រាស់គ្រឿងញៀននៅទីនោះ ដោយពុំសូវទៅច្រៀងខារ៉ាអូខេ ប៉ុន្មានទេ ។
ពាក់ព័ន្ធបញ្ហានេះ លោកវរសេនីយ៍ ស កែវពិសិដ្ឋ អធិការនគរបាលក្រុងតាខ្មៅ បញ្ជាក់ថា នឹងពិនិត្យករណីនេះ តើម្ចាស់ខារ៉ាអូខេ អនុញ្ញាតឲ្យយុវជនសេពគ្រឿងញៀន ឬ ក៏យុវជនលួចលាក់ប្រើប្រាស់ដោយខ្លួនឯង ៕ ឆ ដា
