សិស្សវិទ្យាល័យព្រះបាទសុរ៉ាម្រឹតម្នាក់ត្រូវរថយន្តដឹកគ្រឿងចក្របុកស្លាប់នៅនឹងកន្លែង

ខេត្តកំពង់ឆ្នាំង ៖ សិស្សស្រីម្នាក់នៃវិទ្យាល័យព្រះបាទសុរាម្រឹត បានស្លាប់ភ្លាមៗនៅនឹងកន្លែង បន្ទាប់ពីរថយន្តដឹកគ្រឿងចក្រមួយគ្រឿង របស់ក្រុមហ៊ុនលីយូហេង ខេមបូឌា ខនស្រាក់សិន បានបើកបុកសិស្សសាលាពីក្រោយ ។ ហេតុការណ៍នេះបានកើតឡើងកាលពីវេលាម៉ោង ២និង៣០នាទីរសៀលថ្ងៃសុក្រ ៥កើត ខែបុស្ស ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២២ ខែធ្នូ ឆ្នាំ២០១៧ នៅតាមបណ្តោយផ្លូវជាតិលេខ៥ ស្ថិតក្នុងភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។

សមត្ថកិច្ចបានឲ្យដឹងថា ជនរងគ្រោះដែលស្លាប់នៅក្នុងឧប្បត្តិហេតុគ្រោះថ្នាក់ចរាចេរណ៍នេះ មានឈ្មោះ ធីម សុផានី ភេទស្រី អាយុ១៧ឆ្នាំ រៀនថ្នាក់ទី១១ សេ មានស្រុកកំណើត នៅឃុំដា ស្រុកកំពង់លែង ខេត្តកំពង់ឆ្នាំង ។

សមត្ថកិច្ចបានឲ្យដឹងទៀតថា នៅមុនពេលកើតហេតុ ជនរងគ្រោះជិះកង់មកពីសាលាវិទ្យាល័យព្រះបាទសុរាម្រឹតក្នុងទិសដៅពីត្បូង ទៅជើង នៅពេលមកដល់ចំណុចកើតហេតុ ក៏ស្រាប់តែមានរថយន្តដឹកគ្រឿងចក្រមួយគ្រឿងម៉ាកហ៊ីយ៉ាន់ដាយ ពាក់ស្លាកលេខភ្នំពេញ៣A-៨៥៧៩ របស់ក្រុមហ៊ុន លីយូហេង ខេមបូឌា ខនស្រាក់សិន បើកបរដោយ ឈ្មោះ ង៉ូវ យ៊ុន ភេទប្រុស អាយុ៣៦ឆ្នាំ រស់នៅភូមិបឹងងោង ឃុំទឹកល្អក់ ស្រុកគងពិសី ខេត្តកំពង់ស្ពឺ ។ បើកបរក្នុងល្បឿន យ៉ាងលឿនបានបុកសិស្សស្រីពេញមួយទំហឹងតែម្តង បណ្តាលឲ្យ ក្មេងស្រីសិស្សសាលាដួលទៅនឹងផ្លូវ ត្រូវរថយន្តកិនបន្ថែមស្លាប់ភ្លាមៗតែម្តង ។

ក្រោយពេលកើតហេតុ រថយន្តបានបន្ថែមល្បឿនរត់ មកដល់ក្លោងទ្វា វត្តធម្មយុតិ្តទើបសមត្ថកិច្ចឃាត់បាន យកទៅទុកនៅអធិការដ្ឋាននគរបាលក្រុងកំពង់ឆ្នាំង ដើម្បីរង់ចាំដោះស្រាយតាមនីតិវិធី ៕ ចន្ថា