សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានករណីគ្រោះថ្នាក់ចរាចរណ៍គួរឲ្យរន្ធត់ទាំងកណ្ដាលអធ្រាត បង្កឲ្យមានការភ្ញាក់ផ្អើលដល់អ្នកភូមិកំពុងដេកលង់លក់ស្កប់ស្កល់ ភ័យលស់ព្រលឹងចេញមកមើល ខណៈមានរថយន្ត និងរថយន្តបុកគ្នាធ្លាក់ផ្លូវរួចបន្តទៅបុកដើមឈើរបស់អ្នកភូមិ តែមិនបុកចូលផ្ទះប្រជាពលរដ្ឋនោះឡើយ។
ហេតុការណ៍នេះបានកើតឡើងកាលពី ថ្ងៃសៅរ៍ ៦កើត ខែបុស្ស ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២៣ ខែធ្នូ ឆ្នាំ២០១៧ វេលាម៉ោងរំលងអធ្រាត្រ នៅចំណុចលើផ្លូវជាតិលេខ១គីឡូម៉ែត្រលេខ១៣៨ លេខ១៣៩ ស្ថិតក្នុងភូមិលៀប ឃុំកណ្តៀងរាយ ស្រុកស្វាយទាប ខេត្តស្វាយរៀង ។
យោងតាមសមត្ថកិច្ចនគរបាលស្រុកស្វាយទាបបានប្រាប់អ្នកកាសែតនគរវត្តប្រចាំខេត្តស្វាយរៀងថា រថយន្តដែលបង្កហេតុ ម៉ាក នីសសាន់ ពណ៌ក្រហម ពាក់ស្លាកលេខ ចង្កូតស្តាំ TK-០១១០ បើកបរដោយបុរសមិនស្គាល់អត្តសញាណ ក្រោយមកបានរត់គេចខ្លួនភ្លាមៗបន្សល់តែរថយន្តនៅនឹងកន្លែងកើតហេតុ។
ចំណែកភាគីរថយន្តម្ខាងទៀត មានម្ចាស់ឈ្មោះ ប៉ុល សារឿន ភេទប្រុស អាយុ ៣៧ឆ្នាំ ជនជាតិខ្មែរ មុខរបររត់តាក់ស៊ី មានទីលំនៅភូមិអូសំដី ឃុំធ្លក ស្រុកស្វាយជ្រំ ខេត្តស្វាយរៀង រងរបួសស្រាល ចំពោះរថយន្ត ម៉ាកហាយឡែនឌរ័ ពណ៍ទឹកប្រាក់ ស្លាកលេខភ្នំពេញ២AK-៤៣៣៩ ខូចខាតទាំងស្រុង។
ប្រភពបន្តថា មុនកើតហេតុមានរថយន្តម៉ាក នីសសាន់ ពណ៌ក្រហមស្លាក់លេខ ចង្កូតស្តាំមួយគ្រឿងដោយធ្វើដំណើរទិសដៅពីលិចទៅកើតក្នុងល្បឿនលឿន មិនប្រកាន់ស្តាំ ស្រាប់តែទៅបុកនឹងរថយន្ត ម៉ាកហាយឡែនឌរ័ ពណ៌ទឹកប្រាក់មួយគ្រឿង បញ្ច្រាសគ្នាយ៉ាងពេញទំហឹងលាន់សូរដូចរន្ទះ និងបន្តទៅបុកដើមឈើរបស់អ្នកភូមិ សំណាងអ្នកបើករថយន្តរងរបួសស្រាលតែប៉ុណ្ណោះ ។
ក្រោយមក សមត្ថកិច្ចមូលដ្ឋានបានមកដល់ និងវាស់វែងអូសរថយន្តទាំង២គ្រឿងមកអធិការដ្ឋាននគរបាលស្រុកស្វាយទាបដោះស្រាយពេលក្រោយតាមច្បាប់ ៕ យឹម សុថាន
