សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនជាតិចិនពីរនាក់ បានបើករថយន្តដេញបុកគ្នាជាមួយរថយន្តមួយគ្រឿងទៀតមិនចាំម៉ាក ហើយរេចង្កូតជ្រុលទៅបុកនឹងម៉ូតូមួយគ្រឿង ដែលជិះស្របទិសគ្នាចំពីក្រោយពេញទំហឹង និងរុញផ្ទប់ឡើងលើចិញ្ចើមផ្លូវជ្រុលទៅបុកបង្គោលថ្ម និងដើមត្របែកព្រៃ នៅមុខស្ថានទូតវៀតណាម បាក់អស់១ថែម ទៀត ទើបកល់រថយន្តទៅមុខលែងរួច តែមិនបង្កឲ្យមនុស្សរងរបួសធ្ងន់ទេ ។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលវេលាម៉ោង១០និង២០នាទីយប់ ថ្ងៃអាទិត្យ ៧កើត ខែបុស្ស ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៤ ខែធ្នូ ឆ្នាំ២០១៧ ស្ថិតនៅចំណុចមុខស្ថានទូតវៀតណាម តាមបណ្ដោយផ្លូវព្រះមុនីវង្ស ក្នុងសង្កាត់ទន្លេបាសាក់ ខណ្ឌចំការមន រាជធានី ភ្នំពេញ ។
បើតាមសម្ដីប្រជាពលរដ្ឋដែលឃើញហេតុការណ៍គ្រោះថ្នាក់ចរាចរណ៍ខាងលើ បានប្រាប់ឲ្យដឹងថា នៅមុនពេលកើតហេតុ គេបានឃើញរថយន្តពីគ្រឿង បានបើកប្រដេញគ្នា តាមផ្លូវ មុនីវង្ស ក្នុងទិសដៅ ពីត្បូងទៅជើង មិនដឹងថាមានរឿងអ្វីនោះទេ ដោយមួយគ្រឿងម៉ាក តូយូតាព្រុស ពាក់ស្លាកលេខ ភ្នំពេញ 2 AM 3410 ជិះគ្នា២នាក់ ជាជនជាតិចិន និងមួយម៉ាក កាម៉ារី បាឡែន មិនចាំស្លាកលេខ ខណៈមកដល់ចំណុចកើតហេតុ ស្រាប់តែរថយន្តកាម៉ារី បាឡែន បានបើក បំបុកគូថរថយន្ត តូយូតាព្រុស ដែលបើកដោយជនជាតិចិន ពេញទំហឹង និងធ្វើឲ្យរថយន្ត ព្រុសរេចង្កូតជ្រុលទៅបុកនិងម៉ូតូ ម៉ាក អាខុន ពណ៌ស ពាក់ស្លាកលេខ ភ្នំពេញ 1Y 0165 ដែលជិះដោយបុរស ពីរនាក់ ដែលធ្វើដំណើរក្នុងទិសដៅស្របគ្នា ចំពីក្រោយពេញទំហឹង រុញផ្ទប់ឡើងលើចិញ្ចើមផ្លូវ បុកនឹងបង្គោលថ្ម និងដើមត្របែកព្រៃ បាក់អស់មួយដើម ទើបកល់រថយន្ត ក្រពិតផ្នែកខាងមុខ ទៅមុខលែងរួច តែសំណាងល្អមិនមានគ្រោះថ្នាក់ដល់មនុស្សដែលជិះក្នុងរថយន្តនោះទេ ដោយឡែកខាងអ្នកបើកម៉ូតូ របស់រលាត់ដៃរលាត់ជើង តិចតួច មិនបានទៅមន្ទីពេទ្យ ។ ចំណែកម៉ូតូ រងការខូចខាត ខ្ទេចខ្ទី ស្ទើរតែទាំងស្រុង។
ដោយឡែករថយន្ត បង្កម៉ាកកាម៉ារី បាឡែន បានបើករថយន្តគេចខ្លួនបាត់ស្រមោល ហើយភ្លាមៗនោះដែរ អ្នកបើកបររថយន្តព្រុសត្រូវបានសមត្ថកិច្ចឃាត់ខ្លួនយកទៅសាកសួរ និងអធិការដ្ធានខណ្ឌចំការមនផងដែរ ។
ក្រោយពេលកើតហេតុ អ្នកបើកបរ ព្រមទាំងរថយន្ត និងម៉ូតូត្រូវបានសមត្ថកិច្ចជំនាញបានចុះមកវាស់វែងយកទៅរក្សានៅការរិយាល័យចរាចរណ៍ជើងគោករាជធានីភ្នំពេញដើម្បីរង់ចាំដោះស្រាយតាមក្រោយ ៕ សរស្មី
