Kevin Trapp ចង់ចាកចេញពី PSG ព្រោះមានឱកាសតិចតួច

អ្នកចាំទីក្រុម Paris Saint Germain (PSG) កីឡាករ Kevin Trapp ចង់ចាកចេញពីក្រុមកំពូលតារាង Ligue 1 រដូវកាល(2017-2018) នេះនាខែមករាខាងមុខ ក្រោយពីមានឱកាសតិចតួចក្នុងការបង្ហាញខ្លួនជាជម្រើស១១នាក់ដំបូង ។

ក្រុមពីរនៅក្របខ័ណ្ឌកំពូលអង់គ្លេស គឺក្រុមCrystal Palace មានទំនាក់ទំនងក្នុងការនាំយកកីឡាករវ័យ២៧ឆ្នាំរូបនេះ ព្រមជាមួយក្រុមហង្សក្រហម Liverpool ក៏សម្តែងចំណាប់អារម្មណ៍ចង់បាន Trapp ក្នុងគោលបំណងយកជំនួស ការធ្លាក់ទម្រង់លេងរបស់កីឡាករអ្នកចាំទីបែលហ្សុិក Simon Mignolet។

កាលពីខែមុនកីឡាករ Trapp ផ្ទាល់ក៏បានទទូច និងចង់បញ្ចេញសមត្ថភាពរបស់ខ្លួនឲ្យក្រុមបានច្រើន ដើម្បីមានឱកាសបង្ហាញខ្លួនឲ្យក្រុមឥន្រ្ទី ដែកអាល្លឺម៉ង់ នៅ World Cup 2018 ឆ្នាំក្រោយ។ តម្លៃខ្លួនរបស់កីឡាករអ្នកចាំទីរូបនេះត្រូវក្រុម PSG ដាក់លក់ក្នុងតម្លៃ 15លានយូរ៉ូ ដើម្បីយកប្រាក់ខ្លះមកកាត់បន្ថយការចំណាយទិញ Neymar និងត្រៀមទិញផ្តាច់កីឡាករ Mbappe។

មានកីឡាករពីររូបផ្សេងទៀតដូចជា ខ្សែបម្រើ Javier Pastore របស់ក្រុមជម្រើសជាតិអាហ្សង់ទីន និងកីឡាករ Goncalo Guedes របស់ក្រុមជម្រើសជាតិព័រទុយហ្គាល់ ក៏អាចនឹងត្រៀមចេញទៅលេងជាលក្ខណៈ អចិន្រ្តៃយ៍ក្រោយពីត្រូវបានក្រុម Valencia ខ្ចីជើងទៅលេង នៅក្របខ័ណ្ឌ La Liga របស់អេស្ប៉ាញកន្លងមកហើយក្តី ។

សូមបញ្ជាក់ថា កីឡាករក្រុមជម្រើសជាតិអាល្លឺម៉ង់រូបនេះបានផ្ទេរពីក្រុម Eintracht Frankfurt នៅ Bundesliga នាស្រុកកំណើត ដើម្បីមកចូលរួមជាមួយ PSG នៅឆ្នាំ2015 ក្នុងតម្លៃខ្លួន 10លានផោន ប៉ុន្តែបច្ចុប្បន្ន Trapp មិនអាចប្រជែងតំណែងអ្នកចាំទីដៃទីមួយជាមួយកីឡាករបារាំង Alphonse Areola នៅរដូវកាលនេះបានទេ ។

ខាងក្រោមនេះគឺជាលទ្ធផលនៃការប្រកួតកាលពីថ្ងៃទី២៥ ខែធ្នូ ឆ្នាំ២០១៧៖