សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់ រួមនឹងថ្នាំញៀន ត្រូវបានកម្លាំងប៉ុស្តិ៍នគរបាលរដ្ឋបាលសំរោង បានធ្វើការឃាត់ខ្លួនជាក់ស្តែងកាលពីវេលាម៉ោង៤និង៣០នាទី ថ្ងៃពុធ១០កើត ខែបុស្ស ឆ្នាំរកា ព.ស ២៥៦១ ត្រូវនឹងថ្ងៃទី២៧ ខែធ្នូ ឆ្នាំ២០១៧ ត្រង់ចំណុច ផ្លូវលំ151 ភូមិសំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ ពីបទរក្សាទុកដោយ ខុសច្បាប់នូវសារធាតុញៀន ។
យោងតាមប្រភពពីមន្រ្តីនគរបាលប៉ុស្តិ៍សំរោង បានឲ្យដឹងថា ជនសង្ស័យទាំង២នាក់នេះ ទី១-ឈ្មោះ រិទ្ធ រ៉ាត់ ភេទប្រុស អាយុ២១ឆ្នាំជនជាតិខ្មែរ មុខរបរកម្មករសំណង់ មានទីលំនៅភូមិបឹងវ៉ា ឃុំត្រាចទង ស្រុកឧត្តង្គ ខេត្តកំពង់ស្ពឺ ។ទី២-ឈ្មោះ អីុ អន ភេទប្រុសអាយុ២៣ឆ្នាំ ជនជាតិខ្មែរ មុខរបរកម្មករសំណង់ មានទីលំនៅ ភូមិត្រពាំងក្តុល ឃុំត្រាចទង ស្រុកឧត្តង្គ ខេត្តកំពង់ស្ពឺ ។សម្ភារៈដកហូតមាន៖ទី១-ក្រាមពណ៍សថ្លា(ម៉ាទឹកកក)ចំនួនមួយកញ្ចប់តូច និងម៉ូតូម៉ាក ស៊ុយសូគីនិច ពណ៌ស ពាក់ស្លាកលេខ ភ្នំពេញ 1FN.8853 ចំនួនមួយគ្រឿង ។
ប្រភពដដែរ បានបន្តទៀតថា នៅមុនពេលកើតហេតុកម្លាំងល្បាតរបស់ប៉ុស្តិ៍នគរបាលរដ្ឋបាលសំរោងបានចេញល្បាតក្នុងភុមិសាស្ត្រ លុះដល់ត្រង់ចំណុចកើតហេតុខាងលើ ប្រទះឃើញជនសង្ស័យ២នាក់ កំពុងជិះម៉ូតូក្នុងទិសដៅពីកើតទៅលិច ដោយមានការសង្ស័យ កម្លាំងល្បាត់របស់យើងក៏ធ្វើការត្រួតពិនិត្យរកឃើញក្រាមពណ៌សថ្លាចំនួនមួយកញ្ចប់ ភ្លាមនោះកម្លាំងសមត្ថកិច្ច ក៏ធ្វើការឃាត់ខ្លួនជនសង្ស័យទាំង២នាក់រួមនឹងវត្ថុតាងយកមកប៉ុស្តិ៍ដើម្បីសាកសួរ និងបញ្ជូនមកអធិការដ្ឋាននគរបាលខណ្ឌព្រែកព្នៅ ដើម្បីកសាងសំណុំរឿងបញ្ជូនទៅតុលាការចាត់ការតាមច្បាប់ ៕ ចាន់ធឿន
