សារព័ត៌មាន នគរវត្ត តែងតែនាំមុខគេជានិច្ច
ប៉ោយប៉ែត៖ កាលពីរសៀល ថ្ងៃសៅរ៍ ៥រោច ខែបុស្ស ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៦ ខែមករា ឆ្នាំ២០១៨ ជនរងគ្រោះ៤នាក់ ក្នុងនោះពលករខ្មែរ២នាក់ និងថៃ២នាក់ បានស្លាប់យ៉ាងវេទនានៅក្នុងទឹកសមុទ្រ ក្នុងចំណោមកម្មករនេសាទសរុបចំនួន៨ នាក់ បន្ទាប់ពីកាណូតរបស់ពួកគេត្រូវកប៉ាល់ដឹកទំនិញធុនធំមួយគ្រឿងបុកទាំងកម្រោលហើយលិចទៅក្នុងផ្ទៃទឹក ត្រង់ចំណុច ១២ អង្សារ និង ៣.២៨ ខ្សែស្របខាងជើង និង ១០១ អង្សារ ខ្សែបណ្តោយខាងកើត ដែលមានចម្ងាយពីច្រាំង ក្នុងស្រុកសត្វហុីប ខេត្តឆុនបុរី ប្រមាណ ៣៨ ម៉ៃល៍ គឺជាង ៦១ គីឡូម៉ែត្រ ។
សេចក្តីរាយការណ៍ថា កប៉ាល់ដឹកទំនិញធុនធំបានបុកជាមួយនឹងកាណូតនេសាទ្រយីហោឆូកឈូឆៃបណ្តាលអោយលិចកាណូតនេសាទ្រដោយនៅលើកាណូតនោះមានមនុស្សចំនួន ៨ នាក់ ( ថៃ៣នាក់ ខ្មែរ៥នាក់ ) រីឯកប៉ាល់ដឹកទំនិញនោះមិនស្គាល់អត្តសញ្ញាណ ច្បាស់លាស់ឡើយ ។
កំលាំងសមត្ថកិច្ចថៃចុះទៅពិនិត្យទីតាំងកើតហេតុ គឺមនុស្សចំនួន៤នាក់ ត្រូវបានសង្គ្រោះអោយរួចផុតពីសេចក្តីស្លាប់ ចេញពីផ្ទៃទឹក ដែលក្នុងនោះមានពលករខ្មែរចំនួន៣នាក់ និងថៃម្នាក់ ព្រមទាំងបានបញ្ជូនទៅសង្គ្រោះនៅក្នុងមន្ទីរពេទ្យ ដោយឡែក កម្មករនេសាទចំនួន ៤ នាក់ទៀត បានបាត់ខ្លួននៅក្នុងទឹកសមុទ្រនោះ ដែលមានពលករខ្មែរ ចំនួន២នាក់ និងថៃចំនួន២នាក់ ( ខ្មែរសុរិន្ទម្នាក់ ) ។
នៅវេលាម៉ោង ៧ ព្រឹក ថ្ងៃទី ៧ ខែមករា ឆ្នាំ ២០១៨ សមត្ថកិច្ចចម្រុះរបស់ថៃបានចុះស្រាវជ្រាវរុករកសពដែលបានបាត់ខ្លួន ។ នៅទីបំផុត សពមនុស្សចំនួន៤នាក់ ត្រូវបានរកឃើញ ដែលក្នុងចំណោមសពពលករខ្មែរទាំងពីរនាក់ គឺមានម្នាក់រស់នៅភូមិពន្លៃ ឃុំកំពែង ស្រុកគិរីវង្ស ខេត្តតាកែវ ៕ វណ្ណា
