សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ មន្ត្រីតុលាការ ថ្លែងថា ព្រះរាជអាជ្ញារងនៃអយ្យការអមសាលាដំបូងខេត្តកណ្តាល ពេលនេះកំពុងស៊ើបអង្កេត ការស្លាប់របស់អ្នកទោសក្នុងពន្ធនាគារខេត្តកណ្តាល ដោយតម្រុយជាច្រើនបង្ហាញថាជាការវៃតប់គ្នារហូតដល់ស្លាប់ ។ ប៉ុន្តែលោក ចាត ស៊ីនាង ប្រធាពន្ធនាគារខេត្តកណ្តាល បដិសេធការលើកឡើងនេះ ។
មន្ត្រីតុលាការ និយាយឱ្យដឹងនៅថ្ងៃទី១១ ខែមករា ថា លោក ឯក ស៊ុនរស្មី ព្រះរាជអាជ្ញារងនៃអយ្យការអមសាលាដំបូងខេត្តកណ្តាល ធ្លាប់កោះអញ្ជើញម្តាយនៃសពអ្នកទោសមកបំភ្លឺរួចហើយ ។ ពេលនេះ តុលាការកំពុងបន្តនីតិវិធីដោយពុំទាន់សម្រេចយ៉ាងណានៅឡើយទេ។
ករណីនេះ ម្តាយនៃសពអះអាងថា កូនប្រុសមានស្លាកស្នាមច្រើនដែលមិនទំនងជាការលោតសម្លាប់នោះទេ ហើយលោកស្រីជាគ្រូបង្រៀនរូបនេះ បានប្តឹងករណីនេះចូលតុលាការ ដើម្បីស្វែងរកការពិត ។
មន្ត្រីតុលាការ ថ្លែងថា ជនត្រូវចោទឈ្មោះ មុត លីណាន ភេទប្រុស អាយុ៣១ឆ្នាំ ជាប់ចោទពីបទ”ធ្វើឱ្យខូចខាតដោយចេតនា”ប្រព្រឹត្តនៅភូមិទេពអរជូន ឃុំកោះខែល ស្រុកស្អាង កាលពីថ្ងៃទី១២ ខែធ្នូ ឆ្នាំ២០១៧ តាមមាត្រា៤១០នៃក្រមព្រហ្មទណ្ឌ។ ជននេះ ត្រូវបានលោក គឹម ម៉េង ចៅក្រមស៊ើបសួរសាលាដំបូងខេត្តកណ្តាល ឃុំខ្លួននៅថ្ងៃទី១៣ ខែធ្នូ ឆ្នាំ២០១៧ ។
កាលពីចុងខែធ្នូ ឆ្នាំ២០១៧ ជននេះបានលោតសម្លាប់ខ្លួនពីស៊ីទែនផ្ទុកទឹកដ៏ធំក្នុងពន្ធនាគារ ដែលអ្នកដឹងរឿងច្បាស់អះអាងថា ទំនងមិនមែនជាករណីលោតសម្លាប់ខ្លួនទេ គឺជាករណីវៃតប់គ្នាក្នុងពន្ធនាគារ ។
លោក ណុស បូផល មេធាវីតំណាងម្តាយសពជនរងគ្រោះថ្លែងថា កាលដែលម្តាយប្តឹងចូលតុលាការ គឺ ចង់ឱ្យតុលាការស្វែងការពិតក្នុងករណីនេះ ដែលម្តាយនៃសពអះអាង ថាសពកូនប្រុសមានស្លាកស្នាមច្រើនដែលមិនទំនងជាការលោតសម្លាប់ខ្លួននោះទេ ។
លោក ចាត ស៊ីនាង ប្រធានពន្ធនាគាខេត្តកណ្តាល បដិសេធថា នេះពុំមែនជាករណីវៃតប់គ្នារហូតដល់ស្លាប់ទេ គឺ អ្នកទោសលោតសម្លាប់ខ្លួនឯង ៕ ចេស្តា
