សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បន្ទាប់ពីសារព័ត៌មានកាសែតនគរវត្ត បានចេញផ្សាយ ពាក់ព័ន្ធនឹងករណីប្រជាពលរដ្ឋ១គ្រួសារដែលមានទីលំនៅក្នុងក្រុម៧ ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ បានធ្វើឲ្យលោកអភិបាលខណ្ឌរូបនោះក្តៅមុខ ហើយនៅវេលាម៉ោង១០ព្រឹក ថ្ងៃសៅរ៍ ៣រោច ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី៣ ខែកុម្ភៈ ឆ្នាំ២០១៨ លោក ចេង មុន្នីរ៉ា អភិបាលនៃគណៈអភិបាលខណ្ឌច្បារអំពៅ បានបញ្ជាកម្លាំងដឹកនាំដោយលោក ណុប ផា អភិបាលរងខណ្ឌ ចុះមកផ្អាកនិងចាប់ជាងធ្វើសំណង់ រួមទាំយកសម្ភារៈនិងរថយន្តស្ទួចមួយគ្រឿង ទាំងតក់ក្រហ៊ល ក្តៅក្រហាយ ដូចជាបទល្មើសព្រហ្មទណ្ឌចឹង ដោយបំពានលើសិទ្ធិប្រជាពលរដ្ឋ គ្មានលិខិតជូនដំណឹង និងគ្មានទាំងលិខិតអនុញ្ញាតផ្អាកការសាងសង់ផងដែរ ។
លោក សេង សិទ្ធិគុណ និងលោក សេង បញ្ញារិទ្ធ ជាបងប្អូនបង្កើតបានរៀបរាប់ថា ដោយសារតែអស់លទ្ធភាពតទៅមុខទៀត ព្រោះតែការពីដំបូងឡើយរាជរដ្ឋាភិបាលបានធ្វើការពង្រីង និងអភិវឌ្ឍន៍ផ្លូវជាតិលេខ១ឲ្យធំទូលាយដើម្បីងាយស្រួលដល់ប្រជាពលរដ្ឋទាំងអស់ធ្វើដំណើរលើដងផ្លូវនេះ។ ប៉ុន្តែសម្រាប់គ្រួសាររបស់គាត់បានគោរពតាមការណែនាំរបស់អាជ្ញាធរដែនដី តាំងពីថ្នាក់ក្រោមរហូតដល់កំពូល និងគាំទ្រយ៉ាងពេញទំហឹងលើការអភិវឌ្ឍផ្លូវជាតិលេខ១នេះ ហើយក៏បានចូលរួមចំណែកចបរិច្ចាគ និងកាត់ដីដែលត្រូវផលប៉ះពាល់នោះដើម្បីងាយស្រួលក្នុងការពង្រីកផ្លូវជាតិមួយនេះ ។
អ្វីដែលគាត់ស្នើសុំ ដែលរហូតមកដល់ពេលនេះវាមិនបានដូចបំណង ហើយលក្ខខណ្ឌ និងពាក្យស្នើសុំបានគោរពច្បាប់ទាំងអស់របស់អាជ្ញាធរដែនដី តែពេលគាត់រុះរើផ្ទះចាស់ រួចសុំច្បាប់សាងសង់ថ្មីឡើងវិញនៅលើដីដែលសល់ បែរជាអាជ្ញាធរចុះផ្អាក។
លោក សេង សិទ្ធិគុណ និងលោក សេង បញ្ញារិទ្ធ ជាបងប្អូនបង្កើតបានរៀបរាប់ថា ពីដើមឡើយដីរបស់ពួកខ្ញុំធំ ហើយវែង តែរដ្ឋត្រូវការអភិវឌ្ឍ ខ្ញុំបានបរិច្ចាគតាមការកំណត់របស់រដ្ឋ ហើយសល់រហូតមកដល់បច្ចុប្បន្នសម្រាប់សាងសង់លំនៅឋាន ពេលស្នើសុំច្បាប់ បែរជាអាជ្ញាធរមិនអនុញ្ញាតិ ដោយឲ្យទៅសុំច្បាប់បន្តនៅសាលារាជធានីភ្នំពេញ។
លោកបានបន្តថា ពេលមកកាន់សាលារាជធានីភ្នំពេញ ពួកគាត់បានរៀបចំបែបបទស្នើសុំ ហើយខាងសាលារាជធានីភ្នំពេញបានអនុញ្ញាតិឲ្យសាងសង់ឡើងវិញ យោងតាមលិខិតលេខ០១១លសរ ចុះថ្ងៃទី៩ ខែមករា ឆ្នាំ២០១៨ ដោយលោក ឃួង ស្រេង អភិបាល នៃគណៈអភិបាលរាជធានីភ្នំពេញ។ ប៉ុន្តែអាជ្ញាធរខណ្ឌច្បារអំពៅ នៅតែមិនអនុញ្ញាតិឲ្យសាងសង់ តាមលិខិតសាលារាជធានីភ្នំពេញដដែល ។ ករណីនេះ អាជ្ញាធរសំអាងថា ពាក់ព័ន្ធនឹងទំនាស់ជាមួយអ្នកជិតខាង ផ្ទុយទៅវិញ គឺបញ្ហាទំនាស់ត្រូវបានដោះស្រាយចប់សព្វគ្រប់តាំងពីថ្ងៃទី២៣ ខែកញ្ញា ឆ្នាំ២០១៥មកម៉្លេះ។
ម្ចាស់សំណង់បានលើកឡើងថា ខ្ញុំគោរពច្បាប់រដ្ឋ ទាំងការសាងសង់ ទាំងការស្នើសុំ ក៏ដូចជាបញ្ហាពន្លាតជាដើម មានចេតនាអនុវត្តតាមអជ្ញាធរ និងជំនាញ ប៉ុន្តែខ្ញុំមិនទទួលបានយុត្តិធម៌ក្នុងរឿងនេះសម្រាប់សាងសង់ ត្រឹមតែធ្វើឡើងវិញលើដីកម្មសិទ្ធិិស្របច្បាប់របស់ខ្លួន ដើម្បីជាជម្រកការស្នាក់អាស្រ័យសម្រាប់កូនមករៀននៅភ្នំពេញ។ ក្នុងនោះ ខ្ញុំមានចម្ងល់ផងដែរថា អភិបាលនៃគណៈអភិបាលរាជធានីភ្នំពេញ គាត់បានយល់ពីបញ្ហានេះច្បាស់ និងអនុញ្ញាតិឲ្យខ្ញុំសាងសង់លំនៅឋានវិញដោយមានលិខិតស្នាមជាផ្លូវការណ៍ ក្នុងនោះ លោកអភិបាលថែមទាំងបានទូរស័ព្ទទៅកាន់អាជ្ញាធរខណ្ឌបញ្ជាក់ឲ្យពួកខ្ញុំបានសង់លំនៅឋានវិញ តែដល់ពេលសាងសង់ មិនត្រឹមតែមកឃាត់សំណង់ប៉ុណ្ណោះទេ ថែមទាំងអះអាងថា ការនិយាយតាមទូរស័ព្ទរបស់អភិបាលរាជធានីភ្នំពេញមិនផ្លូវការណ៍? ពួកគាត់បន្តថា បើចាត់ទុកអភិបាលរាជធានីនិយាយទូរស័ព្ទមិនមែនជាផ្លូវការណ៍ ចុះក្នុងនាមអាជ្ញាធរមូលដ្ឋានមានបានយកចិត្តទុកដាក់ឬទេ ចំពោះលិខិតអនុញ្ញាតិរបស់អភិបាលរាជធានីភ្នំពេញ ដែលចុះថ្ងៃទី៩ ខែមករា ឆ្នាំ២០១៨?
ពាក់ព័ន្ធករណីនេះ កន្លងទៅ លោក ចេង មុន្នីរ៉ា អភិបាលនៃគណៈអភិបាលខណ្ឌច្បារអំពៅបានប្រាប់នគរវត្តតាមទូរស័ព្ទថា ករណីហាមឃាត់សំណង់ដោយសារមានបណ្តឹងពីអ្នកជិតខាង ក្នុងនោះ បញ្ហានេះក៏ត្រូវទៅដោះស្រាយជុុំគ្នានៅមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានី និងនៅសាលារាជធានីភ្នំពេញ។ ក្នុងនោះលោកអភិបាលក៏បានបញ្ជាក់ថា រឿងនេះ ខាងខណ្ឌក៏ត្រូវដាក់សំណើរទៅសាលារាជធានីភ្នំពេញដើម្បីស្នើសុំខាងរាជធានីភ្នំពេញជាអ្នកដឹកនាំមកកំណត់ទីតាំង និងពន្លាតដើម្បីសាងសង់ ។
គួររឮកថា កន្លងទៅមិនត្រឹមតែអាជ្ញាធរខណ្ឌប៉ុណ្ណោះតែចុះឃាត់សំណង់ ក្នុងនោះសូម្បីតែខាងមន្ទីរក៏ចុះឃាត់សំណង់ធ្វើកំណត់ហេតុ ទាំងម្ចាស់ទីតាំងមានលិខិតអនុញ្ញាតិពីលោក ឃួង ស្រេង អភិបាលរាជធានីភ្នំពេញថែមទៀត ដោយសម្អាងថាមានទំនាស់។ ករណីជាក់ស្តែង ពេលម្ចាស់សំណង់បង្ហាញពីឯកសារផ្លូវច្បាប់ លិខិតកាន់កាប់ដីធ្លី លិខិតបញ្ចប់វិវាទ និងលិខិតអនុញ្ញាតិពីលោកអភិបាលរាជធានីភ្នំពេញ បែរជាខាងអនុប្រធានមន្ទីរខាងសំណង់លើកឡើងថា ការឃាត់សំណង់ និងធ្វើកំណត់ហេតុ កាលនោះក្រុមការងាររបស់គាត់មិនបានដឹកថា សំណង់នេះមានលិខិតអនុញ្ញាតិពីលោកអភិបាលរាជធានីភ្នំពេញទៅវិញ។
អ្នកជិតខាងបានសម្តែងនូវការគាំទ្រចំពោះឆន្ទៈម្ចាស់សំណង់កាន់កាប់ដីស្របច្បាប់នេះ និងទទួលស្គាល់ថា អាជ្ញាធរ ក៏ដូចជាជំនាញហាក់មានចេតនាណាមួយបន្ទុចបង្អាក់ដោយប្រើបច្ចេកទេសជំនាញ ដើម្បីឲ្យម្ចាស់សំណង់បង្ខំចិត្តលក់ដីនេះក្នុងតម្លៃថោក ទើបបញ្ហានេះចេះតែកើតមានជាបន្តបន្ទាប់ ។ ពួកគាត់បានលើកឡើងថា ម្ចាស់ទីទាំង ជាមន្ត្រីរាជការមានមុខមាត់ឋាន តួនាទីក្នុងស្ថាប័នរដ្ឋដ៏ជាក់លាក់ផង នៅអាជ្ញាធរ និងជំនាញមានឱកាសគៀបសង្កត់ ចុះបើជាពលរដ្ឋសាមញ្ញធម្មតាវិញ តើពួកគាត់អាចប្រឈមនឹងអំពើអយុត្តិធម៌ ការគៀបសង្កត់តាមរយៈការប្រើអំណាច បច្ចេកទេសជំនាញដើម្បីបង្អាក់សំណង់នេះដ៏កម្រិតណា ។ មិនតែប៉ុណ្ណោះលោកអភិបាលខណ្ឌបានបញ្ជាឲ្យលោក ណុប ផា ជាអភិបាលរងខណ្ឌចុះមកផ្អាកនិងចាប់ជាងធ្វើសំណង់ រួមទាំយកសម្ភារៈនិងរថយន្តស្ទួចមួយគ្រឿងបញ្ជូនទៅសាលាខណ្ឌភ្លាមៗ ទាំងតក់ក្រហ៊ល ដូចជាបទល្មើសព្រហ្មទណ្ឌចឹង ដោយបំពានលើសិទ្ធិប្រជាពលរដ្ឋ ដោយគ្មានសេចក្តីជូនដំណឹង និងគ្មានទាំងលិខិតអនុញ្ញាតផ្អាកការសាងសង់ទៅទៀត ។
ពាក់ព័ន្ធករណីខាងលើនេះផងដែរ លោក ចេង មុន្នីរ៉ា អភិបាលនៃគណៈអភិបាលខណ្ឌច្បារអំពៅ បានប្រាប់តាមទូរស័ព្ទកាលពីព្រឹកថ្ងៃសៅរ៍ ៣រោច ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៣ ខែកុម្ភៈ ឆ្នាំ២០១៨ តាមទូរស័ព្ទ លោកគ្រាន់តែបញ្ជាក់ថា រឿងនេះផុតដៃលោកហើយ គឺលោកបានបញ្ជូនឯកសារទៅសាលារាជធានីភ្នំពេញ ជាអ្នកដោះស្រាយ ៕ ស តារា
