សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ បុរសអ្នកដើរទិញអេតចាយម្នាក់ ត្រូវបានសមត្ថកិច្ចក្រុងតាខ្មៅ ឃាត់ខ្លួន ក្រោយពីរូបគេធ្វើសកម្មភាពឆ្កឹះកញ្ចក់ផ្ទះគេ បម្រុងចូលលួចអីវ៉ាន់ កាលពីម៉ោង៣និង៥នាទីរំលងអធ្រាត្រឈានចូលថ្ងៃទី៣ ខែកុម្ភៈ ឆ្នាំ២០១៨ នៅចំណុចមុខរោងចក្រយូនិត ភូមិបត្តាជី១ សង្កាត់ព្រែកហូរ ក្រុងតាខ្មៅ ខេត្តកណ្តាល។
ជនសង្ស័យឈ្មោះ ង្វៀង តាំងជឿង ភេទប្រុស អាយុ២៧ឆ្នាំ ជនជាតិរៀតណាម ទីលំនៅភូមិតាង៉ូវ សង្កាត់ច្បារអំពៅ១ ខណ្ឌច្បារអំពៅ ភ្នំពេញ មុខរបរទិញអេតចាយ។
សមត្ថកិច្ច បានឲ្យដឹងថា មុនឈានដល់ការឃាត់ខ្លួនជនសង្ស័យខាងលើ គឺកម្លាំងអន្តរាគមន៍ក្រុងតាខ្មៅ បានចេញល្បាត ក៏ឃើញជនសង្ស័យបានចតម៉ូតូចោលនៅលើផ្លូវជាតិលេខ២ ហើយដើរចូលទៅដីមួយកន្លែង មានផ្ទះល្វែងខណៈម្ចាស់គេចាក់សោទុកចោល ហើយមានសម្ភារគ្រឿងសំណង់ជាច្រើយទុកនៅខាងក្នុងផ្ទះ ពេលនោះក៏ឃើញជនសង្ស័យបានយកទួណឺវីសដោះកញ្ចក់ផ្ទះខាងមុខបានមួយផ្ទាំង ហើយក៏ត្រូវសមត្ថកិច្ចឃាត់ខ្លួនតែម្តង។
ក្រោយឃាត់ខ្លួនសមត្ថកិច្ច ដកហូតវត្ថុតាងរួមមាន ៖ ម៉ូតូ១គ្រឿងម៉ាក wave RSX ពណ៌ក្រហមខ្មៅ ស្លាកលេខ ភ្នំពេញ ១DD-២៦៦១ ទូរស័ព្ទ១គ្រឿងម៉ាក Nokia ចុចពិល កូនសោគ្រប់ប្រភេទមួយចំនួន។
ចំពោះមុខសមត្ថកិច្ច ជនសង្ស័យសារភាពថា ខ្លួនគាស់កញ្ចក់ផ្ទះគេ ដើម្បីរកបត់ជើងធំ គ្មានគោលបំណងលួចសម្ភារៈគេឡើយ ហើយខ្លួនបានប្រើប្រាស់អស់រយៈពេល១ឆ្នាំមកហើយ៕
អត្ថបទ និងរូបភាព៖ សារព័ត៌មានក្នុងស្រុក
