សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ បុរសម្នាក់ជិះម៉ូតូម៉ាកស៊ុមម័រអ៊ិច ដើរហៅសំបុត្រការកូន ត្រូវរថយន្តមិនស្គាល់ម៉ាក បុកពេញទំហឹងបណ្តាលឲ្យរងរបួសធ្ងន់។
ហេតុការណ៍នេះ កើតឡើងនៅវេលាម៉ោង៦ល្ងាចថ្ងៃសៅរ៍ ៣រោច ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៣ ខែកុម្ភៈ ឆ្នាំ២០១៨ តាមបណ្តោយផ្លូវជាតិលេខ៦ ត្រង់ចំណុចភូមិថ្នល់ថ្មី ឃុំបារាយណ៍ ស្រុកបារាយណ៍ ខេត្តកំពង់ធំ។
ជនរងគ្រោះឈ្មោះទឹម ខុន ភេទប្រុស អាយុ៥៤ឆ្នាំ រងរបួសធ្ងន់ចំក្បាលទាំងសងខាង និងដៃខាងស្តាំ មានទីលំនៅភូមិអណ្តូងពោធិ៍ ឃុំអណ្តូងពោធិ ស្រុកបារាយណ៍ ខេត្តកំពង់ធំ។
សាក្សីដឹងហេតុការណ៍និយាយថា ជនរងគ្រោះជិះម៉ូតូដើរអញ្ជើញសំបុត្រការកូនប្រុសតាមភូមិនានា ហើយបានជិះម៉ូតូក្នុងគោលបំណងវិលត្រឡប់ទៅផ្ទះវិញ តែត្រូវរថយន្តអត់ស្គាល់ម៉ាកបើកពីជើងទៅត្បូងល្បឿនលឿនដូចហោះ បុកជនរងគ្រោះដែលកំពុងជិះម៉ូតូឆ្លងថ្នល់ ពេញទំហឹង បែកមួកសុវត្ថិភាពរបួសធ្ងន់តែម្តង ហើយរថយន្តបង្កហេតុបានបើករត់គេចខ្លួនបាត់ស្រមោល។
ជនរងគ្រោះត្រូវបងប្អូនដឹកយកទៅសង្រ្គោះនៅមន្ទីរពេទ្យបង្អែកបារាយណ៍-សន្ទុក ហើយខាងមន្ទីពេទ្យយករថយន្តសង្គ្រោះបន្ទាន់ដឹកអ្នករបួសបន្តទៅសង្រ្គោះនៅមន្ទីរពេទ្យក្រុងភ្នំពេញ ។
នគរបាលចរារណ៍ស្រុកបារាយណ៍កំពុងស្រាវជ្រាវរករថយន្តបង្កដើម្បីឲ្យម្ចាស់ចូលខ្លួនមកដោះស្រាយគ្នាតាមច្បាប់ ៕ ប៊ុន រិទ្ធី
