សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មនុស្សប្រុសស្រី៦នាក់បានរងរបួសធ្ងន់ស្រាលបញ្ជូនទៅសង្គ្រោះបន្ទាន់នៅឯគ្លីនិក ខណៈនារីម្នាក់បានបើករថយន្តមួយគ្រឿងម៉ាកឡិចស៊ីសRX-330 បុករ៉ឺម៉កកង់បីហើយក៏រេចង្កូតទៅបុកឡើងលើខឿនផ្លូវ ។
ហេតុការណ៍នេះ កើតឡើងកាលពីវេលាម៉ោង១១យប់ ថ្ងៃសៅរ៍ ៣រោច ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៣ ខែកុម្ភៈ ឆ្នាំ២០១៨ ស្ថិតនៅតាមបណ្តោយផ្លូវព្រះសីហនុ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
បើតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេឃើញនារីម្នាក់បើករថយន្តមួយគ្រឿងម៉ាកឡិចស៊ីសRX-330 ពណ៌ស ពាក់ស្លាកលេខ កណ្តាល2A-4870 ក្នុងទិសដៅពីជើងទៅត្បូង ខណៈមកដល់ចំណុចកើតហេតុខាងលើក៏បានបុករ៉ុម៉កម៉ូតូកង់បីហើយរថយន្តនៅមិនទាន់អស់ល្បឿនក៏រេចង្កូតទៅបុកឡើងលើខឿនផ្លូវ ហើយបានទៅបុកអ្នកដែលអង្គុយលេងនៅលើសួន ៦នាក់រងរបួសធ្ងន់ ស្រាល ត្រូវរថយន្តសង្គ្រោះបន្ទាន់របស់មន្ទីរពេទ្យ ដឹកយកទៅសង្គ្រោះបន្ទាន់ផងដែរ។
ក្រោយពេលកើតហេតុ សមត្ថកិច្ចជំនាញបានវាស់វែងយករថយន្តបង្ក និងរ៉ឺម៉កយកទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីរង់ចាំដោះស្រាយទៅតាមក្រោយ ៕ ស រស្មី
