សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ៧នាក់ កំពុងតែប្រមូលផ្ដុំគ្នាប្រើប្រាស់គ្រឿងញៀន ត្រូវបានកម្លាំងនគរបាលខណ្ឌដង្កោ សហការជាមួយនគរបាលប៉ុស្តិក្រាំងពង្រចុះបង្ក្រាប និងឃាត់ខ្លួន កាលពីវេលាម៉ោង៤រសៀលថ្ងៃចន្ទ ១២រោច ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី១២ ខែកុម្ភៈ ឆ្នាំ២០១៨ ស្ថិតនៅចំណុច ប៉ុស្តិ៍ក្រាំងពង្រ ខណ្ឌដង្កោ រាជធានីភ្នំពេញ រួមទាំងដកហូតថ្នាំញៀនបានចំនួន៨កញ្ចប់ និងវត្ថុតាងមួយចំនួន ។
សមត្ថកិច្ចមូលដ្ឋានបានឲ្យដឹងថាសមត្ថកិច្ចបានទទួលសេចក្តីរាយការណ៍ពីប្រជាពលរដ្ឋថា មានក្រុមញៀនថ្នាំមួយក្រុមកំពុងធ្វើសកម្មភាពប្រើប្រាស់ និងជួញដូរគ្រឿងញៀននៅចំណុចកើតហេតុខាងលើ កម្លាំងសមត្ថកិច្ចមូលដ្ឋានបានសហការគ្នាចុះឡោមព័ន្ធរហូតឈានដល់ការឃាត់ខ្លួនជនសង្ស័យបានទាំង ៧នាក់ និងដកហូតបានថ្នាំញៀនចំនួន ៨កញ្ចប់តូច រួមទាំងសម្ភារប្រើប្រាស់មួយចំនួនផងដែរ ។
ជនសង្ស័យបានឆ្លើយសារភាពថា ដំបូងពួកគេបាននាំគ្នាផឹកស្រាថ្នាំរហូតដល់ស្រវឹង រួចក៏នាំគ្នាទៅកន្លែងកើតហេតុខាងលើ ហើយកំពុងធ្វើសកម្មភាពប្រើប្រាស់គ្រឿងញៀនសមត្ថកិច្ចក៏ទៅដល់ឃាត់ខ្លួនតែម្តង។
ជនសង្ស័យទាំង៧នាក់រួមទាំងវត្ថុតាំងដែលដកហូតត្រូវបានយកកាន់អធិការដ្ឋាននគរបាលខណ្ឌដង្កោ ដើម្បីកសាងសំណុំរឿងបញ្ជូនបន្តទៅសាលាដំបូងរាជធានីភ្នំពេញផ្តន្ទាទោសតាមនីតិវិធីច្បាប់ ៕ ភារ៉ា ដង្កោ
