សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មុខសញ្ញាចោរឆក់ម្នាក់ ត្រូវបានសមត្ថកិច្ចឃាត់ខ្លួន ក្រោយធ្វើសកម្មភាពឆក់កាបូបស្ពាយបានសម្រេច នៅម្ដុំផ្សារដេប៉ូ ផ្លូវលេខ២១៥ ក្នុងសង្កាត់វាលវង់ ខណ្ឌ៧មករា ហើយបានរត់គេចខ្លួនបាន២ថ្ងៃ ឥឡូវត្រូវសមត្ថកិច្ចខណ្ឌ៧មករា តាមស្រាវជ្រាវឃាត់ខ្លួនបានហើយ ។
ហេតុការណ៍ឃាត់ខ្លួននេះនៅវេលាម៉ោង៨និង៣០នាទីព្រឹក ថ្ងៃព្រហស្បតិ៍ ៨កើត ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២២ ខែកុម្ភៈ ឆ្នាំ២០១៨ នៅចំណុចផ្ទះជួល ម្ដុំសង្កាត់សឹងមានជ័យទី៣ ខណ្ឌមានជ័យ រាជធានីភ្នំពេញ ។
ជនសង្ស័យទី១ ឈ្មោះ សុឹង ពិឡា ភេទប្រុស អាយុ៣០ឆ្នាំ មុខរបរជាសិស្ស ស្នាក់នៅក្នុងសង្កាត់ស្ទឹងមានជ័យទី៣ ខណ្ឌមានជ័យ ។ ដកហូតម៉ូតូមួយគ្រឿងម៉ាកហុងដា c125 ពាក់ស្លាកលេខ ភ្នំពេញ 1GM.1491 ។
បើតាមសម្ដីពីលោក នេត សុីថុន អធិការដ្នាននគរបាលខណ្ឌ៧មករា បានប្រាប់ឲ្យដឹងថា មុខសញ្ញាចោរឆក់២ថ្ងៃខាងលើដែលត្រូវបានសមត្ថកិច្ចឃាត់ខ្លួនបាននេះ ក្រោយធ្វើសកម្មភាពឆក់កាបូបស្ពាយពីស្រ្តីម្នាក់ដែល កំពុងជិះម៉ូតូជាមួយប្ដីរបស់គាត់ហើយក៏ត្រូវជនសង្ស័យខាងឆក់បានសម្រេច នៅចំណុចកើតហេតុខាងលើបណ្ដោយឲ្យជនរងគ្រោះ២នាក់ដួលរងរបួសធ្ងន់ ស្រាល ហើយជនសង្ស័យបានរត់គេចខ្លួន ហើយឥឡូវត្រូវសមត្ថកិច្ចខណ្ឌ៧មករាតាមស្រាវជ្រាវឃាត់ខ្លួនបានហើយ ។
បច្ចុប្បន្នជនសង្ស័យ ត្រូវបានកម្លាំងសមត្ថកិច្ចខណ្ឌ៧មករាបញ្ចូនខ្លួនមកអធិការដ្នាននគរបាលខណ្ឌ៧មករា ដើម្បីចាត់ការតាមនិតិវិធី ៕ ស រស្មី
