សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ជាមុខសញ្ញាចោរឆក់ទ្រព្យសម្បត្តិប្រជាពលរដ្ឋ យ៉ាងសកម្មក្នុងមូលដ្ឋានរាជធានីភ្នំពេញ ហើយត្រូវបានប្រជាពលរដ្ឋថតបានតាមរយៈកាម៉ារ៉ាសុវត្ថិភាពដែលដាក់នៅមុខផ្ទះ និងបានយកទៅបង្ហោះក្នុងប្រព័ន្ធសង្គមហ្វេសប៊ុកនោះ រហូតសមត្ថកិច្ចធ្វើការស្រាវជ្រាវភ្លាមៗដោយឃាត់ខ្លួនបានជនសង្ស័យម្នាក់ខាងលើ ។ចំណែកឯបក្ខពួកផ្សេងទៀតសមត្ថកិច្ចកំពុងស្វែងរកចាប់ខ្លួនយកមកដាក់ទោសតាមច្បាប់ ។
ករណីឃាត់ខ្លួនជនសង្ស័យនេះ បានធ្វើឡើងកាលពីរសៀល ថ្ងៃពុធ ៧កើត ខែផល្គុន ឆ្នាំរកា នព្វស័ក ព.ស២៥៦១ ត្រូវនឹង ថ្ងៃទី២១ ខែកុម្ភះ ឆ្នាំ២០១៨ ក្នុងមូលដ្ឋានខណ្ឌចំការមន រាជធានីភ្នំពេញ ។
យោងតាមមន្រ្តីនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ បានឲ្យដឹងថា ជនសង្ស័យម្នាក់ដែលជាមុខសញ្ញាចោរឆក់យ៉ាងសកម្មនេះ ត្រូវបានឃាត់ខ្លួនបន្ទាប់ពីរូបគេនិងបក្ខពួកនាំគ្នាបានធ្វើសកម្មភាពឆក់ទូរស័ព្ទម៉ាក IPhone 7plus ពីជនជាតិបរទេសបានសម្រេច នៅចំណុចផ្លូវលេខ៣០៤ ក្នុងសង្កាត់បឹងកេងកង២ ខណ្ឌចំការមន កាលពីម្សិលមិញ បានសម្រេចហើយព្យាយាមរត់គេចខ្លួនបាត់ កាលពីវេលាម៉ោង២និង៤៩នាទីរសៀលថ្ងៃទី២០ ខែកុម្ភះ ឆ្នាំ២០១៨ ដោយជនសង្ស័យមានគ្នា២នាក់ ជិះម៉ូតូម៉ាក់និច ពណ៌ផ្កាឈូក ពាក់ស្លាកលេខភ្នំពេញ ១GJ- ៩០៥៤ ។
បច្ចុប្បន្ន ជនសង្ស័យកំពុងឃាត់ខ្លួនបណ្ដោះអាសន្ននៅការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ ដើម្បីកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញ ចាត់ការតាមច្បាប់ ៕ ស តារា
