ប៉ែន សារ៉ាវ ចូលរោងការជាមួយនារីមកពីស្វាយរៀង

ភ្នំពេញ៖ ស្ងាត់ៗស្រាប់តែតារាចម្រៀង និងសម្តែង លោក ប៉ែន សារ៉ាវ បានសម្រេចចិត្តចូលរោងការជាមួយគូស្នេហ៍ហើយកាលពីព្រឹកថ្ងៃអាទិត្យ ១១កើត ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៥ ខែកុម្ភៈ ឆ្នាំ២០១៨ បន្ទាប់ពីឈ្វេងយល់ចិត្តគ្នាអស់១ឆ្នាំ។ នារីដែលតារាចម្រៀងរូបនេះចូលរោងការជាមួយ គឺមកពីខេត្តស្វាយរៀង ដែលលោកថា ជានារីសាមញ្ញ ប៉ុន្តែពោរពេញដោយមន្តស្នេហ៍ ។

ប៉ែន សារ៉ាវ ត្រូវបានគេស្គាល់ថា ជាតារាចម្រៀងដែលតស៊ូខ្លាំង ក្នុងការងារសិល្បៈ។ លោកបានរៀបការពេញមុខមាត់ជាមួយនារីស្រស់សោភាម្នាក់ ឈ្មោះហៀក សារីម ក្រោមវត្តមានសាច់ញាតិ និងមិត្តភ័ក្កិចូលរួមកុះករ ។

ពិធីមង្គលការរបស់លោក ត្រូវបានធ្វើឡើងចាប់តាំងពីព្រឹកនៅភោជននីយដ្ឋាន Friend House និងបន្តទទួលភ្ញៀវនៅល្ងាចថ្ងៃដដែល នៅភោជនីយដ្ឋានខាងលើនេះ ប្រមាណ៥០០នាក់ ។ ប៉ែន សារ៉ាវ បញ្ជាក់ថា ភរិយារបស់លោក គឺជាអ្នកជាងអ៊ុតសក់នៅម្តុំចោមចៅ ក្រោយពីបានស្គាល់គ្នា១ឆ្នាំហើយ ទើបយល់ចិត្តគ្នា ក៏សម្រេចចូលរោងជ័យតែម្ដង។ លោកថា ក្រោយរៀបការ លោកនៅតែបន្តការងារសិល្បៈដដែល ហើយភរិយារបស់លោក ក៏នៅតែបន្តការងាររបស់នាងដដែល។

លោកថា ពិធីរៀបការលោកអត់បានឲ្យអ្នកមានគុណចំណាយទេ គឺលោក និងភរិយារួមចំណែកគ្នារៀបចំឡើង។ ចំណែកទីកន្លែងជប់លៀងពេលល្ងាច គឺលោកថៅកែហាងហ្វ្រេនហោស គាត់សុខចិត្តបិទហាងមួយថ្ងៃពេញ ដើម្បីកម្មវិធីមង្គលការលោកផងដែរ ៕ វឌ្ឍនា