រថយន្ត៣គ្រឿងបើកបុកបន្តកន្ទុយគ្នារងការកកស្ទះយ៉ាងខ្លាំង

ភ្នំពេញ៖ រថយន្តចំនួន៣គ្រឿង បានបើកបុកតកន្ទុយគ្នាជាបន្តបន្ទាប់ បណ្តាលឲ្យរងការខូចខាតទាំង៣គ្រឿង និងមានការកកស្ទះចរាចរណ៍យ៉ាងខ្លាំងផងដែរ ។

ហេតុការណ៍នោះបានកើតឡើង កាលពីវេលាម៉ោង៩ និង៣៥នាទីព្រឹក ថ្ងៃសុក្រ ១រោច ខែផល្គុន ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២ ខែមីនា ឆ្នាំ២០១៨ នៅលើកំណាត់ផ្លូវជាតិលេខ៤ ស្ថិតនៅក្នុងភូមិព្រៃស្វាយ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។

តាមប្រភពព័ត៌មានបានឲ្យដឹងថា នៅមុនពេលកើតហេតុ មានរថយន្តដឹកជ្រូកម៉ាកហ៊ីយ៉ាន់ដាយពណ៌ទឹកប្រាក់ ពាក់ស្លាកលេខ សៀមរាប 3A-2254 បើកបរធ្វើដំណើរក្នុងទិសដៅពីពីលិចទៅកើត ក្នុងល្បឿនលឿន ។ លុះពេលទៅដល់ត្រង់ចំណុចកើតហេតុខាងលើ បានជ្រុលទៅបុកពីក្រោយរថយន្តម៉ាកតាកូម៉ា១គ្រឿង ពណ៌ទឹកមាស ពាក់ស្លាកលេខ ភ្នំពេញ 2Y-4735 ដែលកំពុងបើបរក្នុងទិសដៅស្របគ្នា បណ្ដាលឲ្យរងការខូចខាតក្រពឹកផ្នែកខាងក្រោយយ៉ាងដំណំ ។

ប្រភពដដែលបានបន្តទៀតថា ពេលនោះរថយន្តតាកូម៉ាបានរុញរថយន្តតាកូម៉ា ផ្ទប់ពីក្រោយរថយន្តម៉ាកកាមរីឆ្លាម១គ្រឿងទៀត ពណ៌ទឹកមាស ពាក់ស្លាកលេខ ភ្នំពេញ 2AB-7528 ពេញទំហឹងបណ្ដាលឲ្យរថយន្តឆ្លាមក្រពឹតផ្នែកខាងក្រោយយ៉ាងដំណំដែរ ។ ក្រោយពេលកើតហេតុ ភាគីទាំងសងខាងបានសម្របសម្រួលគ្នា ដោយខាងរថយន្តដឹកជ្រូក ដែលជាអ្នកបង្កបានចេញសំណងដើម្បីជួសជុលរថយន្តទាំង២គ្រឿងនោះ បញ្ចប់រឿងនៅនឹងកន្លែងកើតហេតុតែម្ដង ៕ សុខាសែនជ័យ