ក្មេងម្នាក់រត់ឆ្លងថ្នល់មិនប្រយ័ត្នត្រូវរថយន្ដបុកស្លាប់នៅកន្លែងកើតហេតុ

ខេត្តកំពង់ធំ៖ រថយន្ដកូរ៉េបើកបុកក្មេងរត់ឆ្លងថ្នល់ស្លាប់ វេលាម៉ោង១១និង១៥នាទីព្រឹក នៅថ្ងៃព្រហស្បតិ៍ ៧រោច ខែផល្គុន ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៨ ខែមីនា ឆ្នាំ២០១៨ ចំណុចមុខផ្ទះ ឆាំ ម៉ាទ្បែន ផ្លូវជាតិលេខ០៦ ភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ។

ប្រភពពីសមត្ថកិច្ចបានឲ្យដឹងថា គ្រោះថ្នាក់ ចរាចរណ៍ រវាងរថយន្តកូរ៉េ ពណ៌ស ស្លាកលេខ កំពង់ធំ ៣A ០៥៥៧ បើកបរពីជើងទៅត្បូង បុកក្មេងរត់ធ្លងថ្នល់ពីកើតមកលិច ។ អ្នកបើកបររថយន្ត តុប ខេងទ្បុង ភេទ ប្រុស អាយុ ៤៨ ឆ្នាំ រស់នៅភូមិតាទ្បក ឃុំសាលាវិស័យ ស្រុកប្រាសាទបល្ល័ង្គ ខេត្តកំពង់ធំ ។

ក្មេងឆ្លងថ្នល់ឈ្មោះ ហុង លីម៉េង ភេទប្រុស អាយុ៣ឆ្នាំ រស់នៅភូមិថ្នល់បែក ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ស្លាប់នៅកន្លែងកើតហេតុ ។

ក្រោយកើតហេតុសមត្ថកិច្ច ឃាត់ខ្លួនអ្នកបើកបរ រថយន្ត តាមបញ្ជាលោកអុិត សុធាព្រះរាជអាជ្ញាអមសាលាដំបូងខេត្តកំពង់ធំ ដើម្បីដោះស្រាយគ្នាតាមច្បាប់ ៕ ប៊ុន រិទ្ធី