សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះវិហារ៖ រយៈពេលកន្លងមកនេះ នៅក្នុងស្រុកឆែប ខេត្តព្រះវិហារ មានករណីភ្ញាក់ផ្អើលកើតឡើង ដោយសារតែសត្វគោ និងសត្វជាច្រើនទៀត បានងាប់ជាបន្តបន្ទាប់ ដែលគេសង្ស័យថា បណ្តាលមកពីសត្វទាំងនោះ ស៊ីដំណាំដែលគេបាញ់ថ្នាំពុល, ក្រោយមកខាងជំនាញ បានរកឃើញថា ការពិតគឺមានគេដាក់ថ្នាំពុលក្នុងទឹកថ្លុក ដើម្បីចាប់សត្វ។
លោក ពឹង ទ្រីដា ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តព្រះវិហារ បានឲ្យដឹងកាលពីថ្ងៃទី១៥ មិនា ម្សិលមិញ ថា មូលហេតុដែលមានសត្វងាប់ជាបន្តបន្ទាប់នោះ លោកបានដឹកនាំក្រុមការងារមន្ទីរកសិកម្មខេត្ត ចុះពិនិត្យដល់ក្នុងការដ្ឋានទី៣ របស់ក្រុមហ៊ុនហេង យូ នៅចំណុចត្រពាំងដាវ ក្នុងភូមិដងផ្លិត ឃុំឆែបពីរ ស្រុកឆែប ដោយក្រុមការងារបានរកឃើញថា ទីតាំងនោះមានថ្នាំសម្លាប់សត្វល្អិតពណ៌ស្វាយ (ថ្នាំសម្លាប់កណ្តៀរ) ដែលបង្កឲ្យសត្វគោរបស់អ្នកស្រុកងាប់ ក៏ដូចជាសត្វស្លាប និងត្រីមួយចំនួនផងដែរ។ លោក បញ្ជាក់ទៀតថា ថ្នាំពុលនេះ ត្រូវបានគេដាក់សម្រាប់ចាប់សត្វ ដាក់តាមទឹកដក់តូចៗ ឬថ្លុក ដែលមិនទាន់រីង លុះពេលសត្វគោ ឬសត្វផ្សេងៗទៀត ផឹកទឹកនោះវានឹងពុល។
លោក ពឹង ទ្រីដា បានបន្ថែមថា វិធានការការពារកុំឲ្យមានសត្វគោអ្នកស្រុក ក៏ដូចជាសត្វស្លាបងាប់តទៅទៀត ក្រុមការងារជំនាញ បានសហការជាមួយក្រុមហ៊ុន ហេង យូ បានឈូសឆាយដីលប់ទឹកដែលដក់នៅកន្លែងមានថ្នាំពុល និងបានណែនាំប្រជាពលរដ្ឋកុំឲ្យយកសត្វដែលងាប់នោះ ទៅបរិភោគ ជៀសវាងមានគ្រោះថ្នាក់៕
អត្ថបទ និងរូបភាព៖ គេហទំព័រក្នុងស្រុក
