សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖បុរសម្នាក់ទំនងជាស្រវឹងស្រា បានបើករថយន្តមួយគ្រឿងបោះពួយយ៉ាងលឿន ខណៈពេលមកដល់ចំណុចផ្លូវបែកជាបួនបានជ្រុលចង្កូតទៅបុកបង្គោលស្លាកចរាចរ ហើយរថយន្តនៅមិនទាន់អស់ល្បឿនបានជ្រុលទៅបុកទ្វារផ្ទះលក់គ្រឿងសំណង់របស់ប្រជាពលរដ្ឋបណ្តាលឲ្យរងការខូចខាត សំណាងល្អនៅក្នុងហេតុការណ៍មិនបណ្តាលឲ្យមានអ្នករងគ្រោះថ្នាក់ ។
ហេតុការណ៍នេះបង្កឲ្យមានការភ្ញាក់ផ្អើល ឡើងកាលពីម៉ោងជាង៣ទៀបភ្លឺ ថ្ងៃចន្ទ ៣កើត ខែចេត្រ ឆ្នាំ រកា នព្វស័ក ព.ស.២៥៦១ ត្រូវនឹងថ្ងៃទី១៩ ខែមីនា ឆ្នាំ២០១៨ នៅត្រង់ចំណុចផ្លូវ២០១១ កែង និងផ្លូវ សម្តេចជា ស៊ីម ស្ថិតក្នុងសង្កាត់គោកឃ្លាង ខណ្ឌសែនសុខ ។
សមត្ថកិច្ចបានឲ្យដឹងថា រថយន្តបង្កហេតុម៉ាក ម៉ាស់ស្តារ BT50 ពណ៌ស ពាក់ស្លាកលេខ ភ្នំពេញ2AH-9798 បើកបរដោយបុរសម្នាក់មិនត្រូវបានស្គាល់អត្តសញ្ញាណ ។
ប្រភពពត៌មាននៅកន្លែងកើតហេតុបានឲ្យដឹងថានៅមុនពេលកើតហេតុ គេឃើញរថយន្តបង្កបើកបរ តាមបណ្តោយផ្លូវ២០១១ ក្នុងទិសដៅពីត្បូងទៅជើង ក្នុងល្បឿនយ៉ាងលឿន ។ ខណៈមកដល់ចំណុចកើតហេតុ ដែលជាផ្លូវបំបែកជាបួនរថយន្តបានបត់ស្តាំឡើងទៅផ្លូវសម្តេចជាស៊ីម ក៏ជ្រុលចង្កូតទៅបុកបង្គោលស្លាកចរាចរបាក់១ដើម ហើយរថយន្តនៅមិនទាន់អស់ល្បឿនបានជ្រុលទៅបុកទ្វារផ្ទះលក់គ្រឿងសំណង់យីហោជាសួនតារា បណ្តាលឲ្យបែកលូ និងឥដ្ឋតាន់ រួមទាំងឥដ្ឋប្រលោះខ្យល់ ដែលគេដាក់លក់នៅខាងមុខផ្ទះខូចខាតអស់មួយចំនួនទៀត ចំណែកឯរថយន្តរងការខូចខាតផ្នែកខាងមុខ ។ បន្ទាប់ពីកើតហេតុភ្លាមៗនោះអ្នកបើកបររថយន្តបង្កត្រូវបានរថយន្តមួយគ្រឿងទៀតបើកមក ដឹកគេចខ្លួនចេញពីកន្លែងកើតហេតុ បាត់ស្រមោល ។
ក្រោយពេលកើតហេតុ សមត្ថកិច្ចចជំនាញបានយករថយន្តបង្កហេតុទៅរក្សាទុកនៅការិយាល័យចរាចរផ្លូវគោកនៃស្នងការដ្ឋានរាជធានីភ្នំពេញ ដើម្បីរង់ចាំម្ចាស់រថយន្តចូលខ្លួនទៅដោះស្រាយសំណងជាក្រោយ ៕ ជ្រោយពេជ្រ
