សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ កាលពីព្រឹកថ្ងៃ អាទិត្យ ៩កើត ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៥ ខែមីនា ឆ្នាំ ២០១៨ លោកស្រី ហ៊ុន ម៉ាណា ប្រធាន ក្រុមវេជ្ជសាស្ត្រសម្តេចតេជោបានដឹកនាំ ក្រុមគ្រូពេទ្យចុះពិនិត្យ និងព្យាបាលជំងឺ ជូនប្រជាពលរដ្ឋចំនួន ៦៥៧នាក់ ដោយ ឥតគិតថ្លៃនៅក្នុងស្រុកចន្ទ្រា ខេត្តស្វាយរៀង។
លោកស្រី ហ៊ុន ម៉ាណា ប្រធានក្រុមវេជ្ជសាស្រ្តសម្តេចតេជោក៏បាននាំយកនូវការផ្តាំផ្ញើសាកសួរសុខទុក្ខពីសំណាក់ សម្តេចតេជោ ហ៊ុន សែន និងសម្តេចកិត្តិ ព្រឹទ្ធបណ្ឌិត ប៊ុន រ៉ានី ហ៊ុនសែន ជូនប្រជា ពលរដ្ឋ ដែលអញ្ជើញចូលរួម នាឱកាស នោះ ដែលសម្តេចទាំងទ្វេតែងតែយកចិត្តទុកដាក់ដល់ប្រជាពលរដ្ឋគ្រប់ទីកន្លែង ។
មុនការពិនិត្យនិងព្យាបាលជំងឺក្រុមការងារបានផ្តល់ជូនអាហារសម្រន់នៅពេលព្រឹកមាន នំបុ័ង និងភេសជ្ជៈ ទទួលទានរួមគ្នាយ៉ាងឆ្ងាញ់ពិសាប្រកបដោយភាពស្និទ្ធស្នាលបំផុត ។
ពិធីពិនិត្យ ពិគ្រោះ និងព្យាបាលជំងឺ ជូនប្រជាពលរដ្ឋ ដោយឥតគិតថ្លៃនេះ បាន ធ្វើឡើងក្នុងភូមិចន្ទ្រា ឃុំចន្ទ្រា ស្រុកចន្ទ្រា ខេត្តស្វាយរៀងដែលក្នុងពិធីនោះដែរក៏មានការចូលរួមអមដំណើរពីលោក តូច ប៉ូលីវ៉ា អភិបាលរង នៃគណៈអភិបាលខេត្តស្វាយរៀង និងក្រុមការងារ ។
ក្រុមវេជ្ជសាស្ត្រសម្តេចតេជោ ហ៊ុន សែន បានពិនិត្យពិគ្រោះនិងព្យាបាលជំងឺជូនប្រជាពលរដ្ឋដោយឥតគិតថ្លៃនោះរួមមាន៖ វះកាត់តូចចំនួន២៩នាក់, ពិនិត្យ និងព្យាបាលមាត់-ធ្មេញចំនួន៥៨នាក់, ពិនិត្យរោគស្ត្រីចំនួន៦៩នាក់, ពិនិត្យ និងព្យាបាលជំងឺទូទៅចំនួន៤៥៧នាក់, សម្ភព និងអេកូសាស្ត្រ ចំនួន៤៤នាក់, អប់រំសុខភាពដល់ប្រជាពលរដ្ឋដែលទទួលសេវាព្យាបាល, ចែកជូនវ៉េនតាសម្រាប់លោកតា លោកយាយ ចំនួន៣០០នាក់,ផ្តល់សម្ភារសិក្សាសម្រាប់សិស្សានុសិស្សនិងចែកជូនរទេះរុញសម្រាប់ជនពិការចំនួន ១៥គ្រឿងផងដែរ ។
សូមជម្រាបថា នេះមិនមែនជាលើកទី១នោះទេ ដែលក្រុមវេជ្ជសាស្ត្រសម្តេចតេជោ បានធ្វើសកម្មភាពមនុស្សធម៌បែបនេះ ព្រោះកន្លងមកក្រុមវេជ្ជសាស្ត្រសម្តេចតេជោតែងតែធ្វើសកម្មភាពចុះព្យាបាលជំងឺ ជូនដល់ប្រជាពលរដ្ឋ និងគ្រួសារកងទ័ព ជាច្រើនខេត្តតាមគោលដៅផ្សេងគ្នារួចមកហើយ ។
ប្រជាពលរដ្ឋដែលបានមកទទួលការ ពិនិត្យ និងព្យាលជំងឺ នាពេលនោះសុទ្ធតែបានបង្ហាញពីភាពសប្បាយរីករាយ ចំពោះសកម្មភាពក្រុមវេជ្ជសាស្ត្រសម្តេចតេជោ ដែលបានចុះមកពិនិត្យនិងព្យាបាលជំងឺ ជូនពួកគាត់ដោយឥតគិតថ្លៃ។
កម្មវិធីក្រុមវេជ្ជសាស្ត្រសម្តេចតេជោគឺជាការចូលរួមកាត់បន្ថយលើការចំណាយ របស់ពួកគាត់បានច្រើនសម្រាប់ការថែទាំសុខភាពបន្ថែមប្រចាំថ្ងៃ។
ដូច្នេះតាមយៈសកម្មភាពក្រុមវេជ្ជ សាស្ត្រសម្តេចតេជោ គឺជាការចូលរួម ចំណែកជាមួយរាជរដ្ឋាភិបាលកម្ពុជា ក្នុងការបម្រើសេវាសុខាភិបាលតាមមូលដ្ឋាន បង្ខិតឱ្យនៅជិតប្រជាពលរដ្ឋ និងធ្វើឱ្យពួក គាត់មានភាពងាយស្រួលបន្ថែមទៀតផ្នែកសេវាថែទាំសុខភាពនេះ ៕ ហេង សូរិយា
