សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ម៉ូតូមួយគ្រឿងជិះដោយល្បឿនលឿន ក្នុងស្ថានភាពស្រវឹងស្រាជោគជាំបានរេចង្កូតមកបុកម៉ូតូមួយគ្រឿងទៀតជិះច្រាស់ទិសគ្នាពេញមួយទំហឹង បណ្ដាលឲ្យរងរបួសធ្ងន់២នាក់ នៅថ្ងៃពុធ ៤រោច ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៤ ខែមេសា ឆ្នាំ២០១៨ លើកំណាត់ផ្លូវលេខ៣៨០ ស្ថិតក្នុងភូមិទូលមាស ឃុំអរិយក្សត្រ ស្រុកល្វាឯម ខេត្តកណ្ដាល ។
មន្រ្ដីនគរបាលចរាចរណ៍ស្រុកល្វាឯមបានឲ្យដឹងថា ម៉ូតូបង្កម៉ាកScoopy ស៊េរីឆ្នាំ២០១៨ ពាក់ស្លាកលេខ ភ្នំពេញ 1GU-5156 ជិះដោយឈ្មោះ គង់ ភេទប្រុស អាយុ៣០ឆ្នាំ មុខរបរកសិករ មានទីលំនៅភូមិអង្គស្នូល ឃុំពើក ស្រុកអង្គស្នូល ខេត្តកណ្ដាល (រងរបួសធ្ងន់)។ ចំណែកភាគីម៉ូតូម្ខាងទៀតម៉ាកហុងដាគុបមូល គ្មានស្លាកលេខ ជិះដោយឈ្មោះ ណាត វណ្តណែត ភេទប្រុស អាយុ១៧ឆ្នាំ មុខរបរកសិករ មានទីលំនៅភូមិព្រែកតារត្ន័ ឃុំកំពង់ប្រាំង ស្រុកពារាំង ខេត្តព្រៃវែង (រងរបួសធ្ងន់)។
ប្រភពដដែលបន្ដថា នៅមុនពេលកើតហេតុ សាក្សីបានឃើញអ្នកជិះម៉ូតូបង្កម៉ាកScoopy ធ្វើដំណើរតាមបណ្ដោយផ្លូវលេខ៣៨០ ក្នុងទិសដៅពីលិចទៅកើត ដោយល្បឿនលឿន និងមានសភាពស្រវឹងស្រាជោគជាំ លុះជិះមកដល់ចំណុចកើតហេតុ ស្រាប់តែម៉ូតូបង្កបានរេចង្កូតមកបុកម៉ូតូមួយគ្រឿងទៀតម៉ាកហុងដាគុបមូលពេញមួយទំហឹងដែលជិះច្រាស់ទិសគ្នា បណ្ដាលឲ្យអ្នកជិះម៉ូតូទាំងគ្រឿងទទួលរងរបួសធ្ងន់តែម្ដង ។
ក្រោយពីមានហេតុការណ៍កើតឡើង ជនរងគ្រោះទាំង២នាក់ត្រូវបានរថយន្ដសាមុយដឹកយកទៅសង្រ្គោះនៅមន្ទីរ រីមធ្យោបាយពាក់ព័ន្ធទាំង២គ្រឿងត្រូវបានសមត្ថកិច្ចវាស់វែង និងកសាងឯកសារដកហូតយកទៅរក្សាទុកនៅអធិការដ្ឋាននគរបាលស្រុកដើម្បីចាត់ការតាមនីតិវិធីច្បាប់៕ ស្អាងជ័យ
