សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ករណីភ្ញាក់ផ្អើលមួយបានកើតឡើង បន្ទាប់ពីស្រ្តីជនជាតិអាមេរិកម្នាក់ បានលោតពីលើផ្ទះ ជាន់ទី២ ប៉ុនប៉ងសម្លាប់ខ្លួនឯង ក្នុងបុរីសែនមនោរម្យ ប៉ុន្តែមិនបានសម្រេចដោយសារតែពេលលោតចុះមកក្រោមក៏ទើលើដំបូលផ្ទះ រួចទើបធ្លាប់មកក្រោមដីរងរបួសស្រាល ភ្លាមនោះស្រ្តីរងគ្រោះនៅតែព្យាយាមរត់ចូលឡាន ផ្អើលដល់ប្រជាពលរដ្ឋនៅក្បែរនោះក៏បានដេញចាប់ និង ឃាត់មិនឲ្យធ្វើអត្តឃាត ស្រាប់តែស្ត្រីរូបនោះបានដួលសន្លប់តែម្ដង ហើយត្រូវរថយន្តសាមុយដឹកទៅសង្គ្រោះនៅមន្ទីរពេទ្យភ្លាមៗផងដែរ ។
ហេតុការណ៍ខាងលើនេះ បានកើតឡើងកាលពីយប់ ថ្ងៃអង្គារ ៣កើត ខែពិសាខ ឆ្នាំច សំរឹទ្ធឹស័ក ព.ស២៥៦២ ត្រូវនឹង ថ្ងៃទី១៧ ខែមេសា ឆ្នាំ ២០១៨ ក្នុងបុរីសែនមនោរម្យ សង្កាត់ទន្លេបាសាក់ ខណ្ឌចំការមន ។
ស្ត្រីរងគ្រោះខាងលើនេះ មិនត្រូវបានស្គាល់អត្តសញ្ញាណនោះទេ គ្រាន់តែដឹងថា ជាជនជាតិអាមេរិក ស្បែកខ្មៅ ហើយករណីប៉ុនប៉ងធ្វើអត្តឃាតខ្លួនឯង មិនដឹងមូលហេតុនៅឡើយ ។
ក្រោយកើតហេតុសមត្ថកិច្ចមូលដ្ឋាន បានចុះមកដល់កន្លែងកើតហេតុដោយឃើញថា ស្ត្រីរងគ្រោះជាជនអាមេរិក ទើបសមត្ថកិច្ចប៉ុស្តិ៍ ធ្វើការទាក់ទងទៅកាន់ស្ថានទូតអាមេរិក រួចប្រគល់នារីរងគ្រោះទៅឲ្យខាងស្ថានទូតនាំនារីរូបនេះ ទៅសម្រាកព្យាបាលនៅមន្ទីរពេទ្យកាល់ម៉ែតផងដែរ ៕ស តារា
