សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ៖ ភ្ញៀវទេសចរជាតិនិង អន្តរជាតិបានមកកម្សាន្តនៅតាមបណ្តា គោលដៅទេសចរនានាក្នុងខេត្តក្រចេះ នាឱកាសបុណ្យចូលឆ្នាំ ប្រពៃណីជាតិ រយៈពេល៣ថ្ងៃ មានការថយចុះប្រមាណ ២,៤៦ភាគរយ ដែលភ្ញៀវសរុបមានចំនួន ១០២.៣០៦នាក់ ប្រៀបធៀប រយៈពេលដូចគ្នាឆ្នាំ២០១៧ មានប្រមាណ១០៤.៨៩០នាក់ ថយចុះ ២.៥៨៤នាក់។ នេះបើយោងតាមរបាយការណ៍មន្ទីរទេសចរណ៍ខេត្តក្រចេះ។
គួរបញ្ជាក់ថា កន្លែងសម្រាប់ភ្ញៀវទេសចរដែលពេញនិយមក្នុងខេត្តក្រចេះនោះ មានដូចជា រមណីយដ្ឋានទឹកជួរកាំពី,ឆ្នេរខ្សាច់កោះទ្រង់ និងរមណីយដ្ឋានកោះសុក្រំ ជាដើម ។
ខេត្តក្រចេះក៏ជាខេត្តទិសដៅទេសចរណ៍ មួយដែរក្នុងប្រទេសកម្ពុជា ក្នុងឱកាសនៃការឈប់សម្រាកកម្សាន្តអបអរឆ្នាំថ្មី ដោយសារខេត្តនេះមានតំបន់កម្សាន្តច្រើនទាំងធម្មជាតិ និងកែច្នៃ ហើយចំនួនភ្ញៀវទៅ សម្រាកកម្សាន្តក្នុងខេត្តនេះក៏មានការកើនឡើងពីមួយឆ្នាំទៅមួយឆ្នាំផងដែរ ។
ខេត្តក្រចេះជាខេត្តមួយឋិតនៅភាគ ឦសានប្រទេសកម្ពុជា ដែលមានសក្ដានុពលលើវិស័យទេសចរណ៍ ដោយមានរមណីយដ្ឋានស្រស់ ស្អាតជាច្រើនកន្លែង ប្រកបដោយភាពទាក់ទាញភ្ញៀវទេសចរជាតិ-អន្តរជាតិ ហើយជារៀងរាល់ឆ្នាំ ខេត្តនេះបានទទួលកំណើនទេសចរជានិច្ច ។ រមណីយដ្ឋានទឹកជួរកាំពី នៅតែឈរលំដាប់លេខ១ មានភាពទាក់ទាញ ទេសចរជាងគេ ក្នុងចំណោមរមណីយដ្ឋានជាច្រើនរបស់ខេត្តនេះ ។
ដោយឡែកបញ្ហាគ្រោះថ្នាក់ចរាចរណ៍ វិញបានកើតឡើង៣ករណីនៅផ្លូវលេខ៧ និងផ្លូវលេខ៣៧១ បណ្តាលឲ្យមនុស្សម្នាក់ស្លាប់ និង៤នាក់ទៀតរងរបួស។ ចំណែកស្ថានភាពផ្លូវទឹក និងសន្តិសុខ មានសភាពធម្មតា ។ នេះបើយោងតាមរបាយការណ៍ របស់នគរបាលការិយាល័យចរាចរណ៍នៃស្នងការដ្ឋាននគរបាលខេត្តក្រចេះ ៕ ហេង សូរិយា
