សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កាកបាទក្រហមកម្ពុជាដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន នាថ្ងៃព្រហស្បតិ៍ ៥ កើត ខែពិសាខ ឆ្នាំច សំរឹទ្ធិស័ក ព.ស. ២៥៦១ ត្រូវនឹងថ្ងៃទី១៩ ខែមេសា ឆ្នាំ ២០១៨ បានឧបត្ថម្ភថវិកាគ្រឿងបរិភោគ និងសម្ភារប្រើប្រាស់មួយចំនួនជូនលោកចៅ ច័ន្ទណារី អាយុ៦៤ឆ្នាំ ជាតារាសម្តែងជើង ចាស់ធ្លាប់ទទួលបានពានរង្វាន់លេខ១ ទូទាំងប្រទេសក្នុងការប្រកួតខ្សែភាពយន្តខ្មែរក្នុងឆ្នាំ១៩៩១ ក្នុងការសម្តែងជាតួឯកក្នុងរឿង “ស្មានមិនដល់” និងមានស្នាដៃសម្តែងជាច្រើនទៀត ។
ក្នុងឱកាសនោះ លោកស្រី ម៉ែន នារី សោភ័គអគ្គលេខាធិការរងទី១កក្រកបានពាំនាំប្រសាសន៍របស់ សម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុន សែន ដែលផ្តាំផ្ញើសួរសុខទុក្ខ និងគិតគូរចំពោះស្ថានភាពរស់នៅរបស់លោក ចៅ ច័ន្ទណារី ដែលជាសិល្បករជើងចាស់បានបន្សល់ទុកស្នាដៃសម្តែងជាច្រើនសម្រាប់អ្នកជំនាន់ក្រោយ។ ជាមួយគ្នានេះ លោកស្រីបានផ្តាំផ្ញើឲ្យខិតខំថែរក្សាសុខភាពឲ្យបានល្អ និងបន្តប្រឹងប្រែងប្រកបរបរចិញ្ចឹមជីវិតដើម្បីអនាគតប្រពន្ធ-កូនតទៅមុខទៀត។
លោក ចៅ ច័ន្ទណារី និងភរិយា ដែលមកពីភូមិវាលតូច ឃុំសេដា ស្រុកតំបែរ ខេត្តត្បូងឃ្មុំ បានថ្លែងអំណរគុណយ៉ាងជ្រាលជ្រៅចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងសម្តេចតេជោ ហ៊ុន សែន ដែលតែងតែមានមេត្តាធម៌ មានក្តីករុណា ចំពោះសុខទុក្ខរបស់សិល្បករជើងចាស់និងប្រជាជនទូទៅជួបការលំបាកដោយគ្មានការរើសអើងអ្វីឡើយ ៕ ហេង សូរិយា
