សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ដើម្បីចូលរួម កាត់បន្ថយនៃការកកស្ទះចរាចរណ៍ នៅចំណុចរង្វង់មូលចោមចៅ នៃផ្លូវប្រសពគ្នាចំនួន៤ រដ្ឋបាលសាលារាជធានីភ្នំពេញ នឹងបើកការដ្ឋានសាងសង់ស្ពានអាកាសនិងផ្លូវក្រោមដី នៅពេលខាងមុខដ៏ខ្លីនេះ ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឲ្យដឹង ក្រោយនៃកិច្ចប្រជុំ ជាមួយលោក ឃួង ស្រេង អភិបាលរាជធានីភ្នំពេញ និងមន្ដ្រីជំនាញពាក់ពន្ធ័ សាធារណៈការ និងដឹកជញ្ជូនរាជធានី កាលពីរសៀលថ្ងៃពុធ ១១ កើត ខែពិសាខ ឆ្នាំចសំរិទ្ធស័ក ព.ស២៥៦២ ត្រូវនិងថ្ងៃ២៥ មេសា ឆ្នាំ២០១៨ នេះថា៖ សាលារាជធានីភ្នំពេញ នឹងបើកការដ្ឋាន សង់ស្ពានអាកាស និងផ្លូវក្រោមដី ដែលគ្រោងចំណាយចំណាយពេលប្រមាណ២០ខែ ដើម្បីស្ថាបនា អោយរួចរាល់ ។ លោកបន្តថា៖ តំបន់រង្វង់មូលចោមចៅនិងតំបន់ខាងមុខអាកាសយានដ្ឋានអន្តរជាតិភ្នំពេញ នឹងមិនមានការកកស្ទះចរាចរណ៍ទៀតទេ បន្ទាប់ពីស្ពានអាកាសនិងផ្លូវក្រោមដីចោមចៅ ស្ថាបនារួច។
លោក ម៉េត មាសភក្កី បានបន្តថា ៖ បច្ចុប្បន្ន ស្ថានភាពចរាចរណ៍ នៅចំណុចរង្វង់មូលចោមចៅ ក្នុងខណ្ឌពោធិសែនជ័យ មានការកកស្ទះចរាចរណ៍ស្ទើររាល់ថ្ងៃ ចំពោះចរាចរណ៍នៅលើផ្លូវជាតិលេខ៤ ផ្លូវជាតិលេខ៣ និងមហាវិថីសហព័ន្ធរុស្ស៊ី ចូលមករាជធានីភ្នំពេញ ក៏មានការកកស្ទះច្រើនផងដែរ។
លោកបន្ថែមថា៖ ការស្ថាបនាស្ពានអាកាស និងផ្លូវក្រោមដី នៅចំណុចរង្វង់មូលចោមចៅ នេះក្រុមការងារបានប្រជុំជាមួយស្ថាប័នមួយចំនួន ដូចជាអគ្គិសនីកម្ពុជា រដ្ឋករទឹកស្វ័យ័ត្នរាជធានីភ្នំពេញ អាកាសចរណ៍ស៊ីវិល Jica ប្រជុំពិភាក្សាគ្នា ដោយបានឯកភាពជ្រើសយក ក្នុងចំណោមគម្រោងចំនួន៧ ដែលមានផលប៉ះពាល់តិចតួចបំផុតកាលពីពេលថ្មីៗនេះ។ លោកបន្តថា៖ ចំពោះថវិកាដើម្បីសាងសង់ស្ពានអាកាសនិងលផ្លូវក្រោមដីនេះ ជាថវិការបស់សាលារាជធានីភ្នំពេញ តែលោកមិនបានបញ្ជាក់ថា គ្រោងចំណាយអស់ប៉ុន្មាននោះទេ ចំពោះក្រុមហ៊ុនដែលត្រូវសាងសង់ អ្នកនាំ ពាក្យមិនបានបញ្ជេញអោយដឹងនោះដែរ។
លោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ បានឲ្យដឹងថា ៖ ស្ពានអាកាសនិងផ្លូវក្រោមដីនៅរង្វង់មូលចោមចៅ នឹងស្ថាបនាក្នុងរយៈពេលប្រមាណ២០ខែ អាចរួចរាល់ ខណៈដែលកំណាត់មហាវិថីសហពន្ធ័រុស្ស៊ី ចាប់ពីផ្លូវលេខ២០១១ ដល់រង្វង់មូលចោមចៅ ត្រូវបានពង្រីកបន្ថែមទទឹងឲ្យធំទូលាយ អាចឲ្យរថយន្តធ្វើចរាចរណ៍៣គន្លងចូលក្នុងក្រុង និង៤គន្លងចេញក្រៅក្រុង ដោយមានសួនច្បារនៅចំកណ្តាល និងមានដាក់ប្រព័ន្ធលូ២ខ្សែ គឺ១ខ្សែនៅចំកណ្តាលសួនទំហំ៨តឹក និង១ខ្សែទៀតដាក់នៅចិញ្ចើមផ្លូវមានទំហំ១,៥ម៉ែត្រ បានស្ថាបនារួចហើយ។
សូមបញ្ជាក់ថា៖ សាលារាជធានីភ្នំពេញ មានស្ពានអាកាសចួន៥រួចមកហើយ រួមមានស្ពានអាកាសក្បាលថ្នាល់ ស្ទឺងមានជ័យ ៥មករា(តិចណួ) ៧មករា(ពេទ្យលោកសង្ឃ) ស្តុបបផ្សារដីហ៊ុយ៕ សំរិត
