សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សត្វគោញី១ក្បាលបានងាប់ភ្លាមៗនៅ និងកន្លែងកើតហេតុ ខណៈសត្វគោនោះបានរត់ឆ្លងផ្លូវហើយ ក៏ត្រូវរថយន្តTACOMA១គ្រឿងបើកក្នុងល្បឿនលឿនហើយចាប់ហ្វ្រាំងមិនទាន់បុកពេញទំហឹងចំណែករថយន្តរងការខូចខាតផ្នែកខាងមុខយ៉ាងតំណំ ប៉ុន្តែសំណាងល្អអ្នកបើកបរមិនរងរបួស ។
ហេតុការណ៍នេះបានកើតឡើងកាលថ្ងៃព្រហស្បតិ៍ ១២កើត ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៦ ខែមេសា ឆ្នាំ២០១៨ វេលាម៉ោង១៤ និង៣៥នាទី តាមបណ្តោយផ្លូវ ភ្នំពេញហាណូយ(១០១៩) ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។
ប្រភពពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញមានរថយន្តTACOMA១គ្រឿងព័ណទឹកប្រាក់ពាក់ស្លាកលេខភ្នំពេញ2AR.3020 បើកបរដោយបុរសម្នាក់មិនស្គាល់ឈ្មោះ ក្នុងទិសដៅពីជើងទៅត្បូងក្នុងល្បឿនលឿនលុះមកដល់ចំណុចកើតហេតុស្រាប់តែមានសត្វគោញី១ ក្បាលបានរត់ចេញពីក្នុងភូមិពីលិចទៅកើតឆ្លងផ្លូវធ្វើឲ្យអ្នកបើកបររថយន្តជាន់ហ្វ្រាំងមិនទាន់ ក៏ជ្រុលទៅ និងសត្វគោនោះខ្ទាតជាង៥០ម៉ែត្រ បណ្តាលឲ្យសត្វគោនោះភ្លាមៗ ចំណែករថយន្តរងការខូចខាតយ៉ាងតំណំ និងផ្ទុះពោងចេញប៉ុន្តែអ្នកបើកបរមិនរងរបួស។
ក្រោយកើតហេតុ ក៏នគរបាលមូលដ្ឋាន និងនគរបាលចរាចរខណ្ឌសែនសុខបានចុះមកដល់កន្លែងកើតហេតុ ដើម្បីរកម្ចាស់គោមកដោះស្រាយគ្នាជាមួយ និងម្ចាស់រថយន្ត ប៉ន្តែដោយសារតែរកម្ចាស់គោមិនឃើញសមត្ថកិច្ចបានបង្កើតគណៈកម្មការចំរុះហើយហៅអ្នកកុងសុីកាប់គោមកទិញសត្វគោនោះដើម្បីយកប្រាក់ឲ្យទៅម្ចាស់រថយន្តយកទៅជុសជុលដោយខ្លួនឯង។
ក្នុងនោះដែសមត្ថកិច្ចសូមសំណូមពរដល់បងប្អូនប្រជាពលរដ្ឋទាំងអស់ដែលមានចិញ្ចឹមសត្វគ្រប់ប្រភេទត្រូវមើលចងខ្សែវាឲ្យបានត្រឹមត្រូវផង ជៀសវាងកុំឲ្យមានកើតហេតុដូចជាករណីខាងលើនេះទៀត៕ តុង សីហា
