សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ មានឧប្បត្តិហេតុគ្រោះថ្នាក់ចរាចរណ៍មួយបណ្តាលឲ្យបុរសម្នាក់ស្លាប់ភ្លាមៗនៅកន្លែងកើតហេតុ ខណៈជិះម៉ូតូបត់ឆ្លងផ្លូវមិនប្រយ័ត្នត្រូវរថយន្ដបុកពេញមួយទំហឹងកាលពីវេលាម៉ោង ៤និង១០នាទីរសៀល ថ្ងៃ ព្រហស្បតិ៍ ១២ កើត ខែ ពិសាខ ឆ្នាំ ច សំរឹទ្ធិស័ក ព.ស.២៥៦២ ត្រូវនឹង ថ្ងៃទី២៦ ខែមេសា ឆ្នាំ២០១៨ លើកំណាត់ផ្លូវជាតិលេខ១ ត្រង់ចន្លោះគីឡូម៉ែត្រលេខកាលពីវេលាម៉ោង៤០-៤១ ស្ថិតក្នុងភូមិជ្រោយដង ឃុំ សំរោងធំ ស្រុកកៀនស្វាយ ខេត្តកណ្តាល ។
មន្រ្ដីនគរបាលចរាចរស្រុកកៀនស្វាយបានឲ្យដឹងថា ជនរងគ្រោះស្លាប់បាត់បង់ជីវិតឈ្មោះ ជី ស្រេង ភេទប្រុស អាយុ៥៨ឆ្នាំ មានទីលំនៅភូមិស្ទឹង ឃុំសំរោងធំ ស្រុកកៀនស្វាយ ខេត្តកណ្តាល ជិះម៉ូតូម៉ាក SUZUKI STEP ពណ៌ក្រហម ពាក់ស្លាកលេខ ភ្នំពេញ 1Q-4313 ។ ចំណែកឯរថយន្ដម៉ាកSSANG YONG ISTANA ពណ៌លឿង ប្រភេទដឹកអ្នកដំណើរ ធុនតូច គ្មានស្លាកលេខ បើកបរដោយជនមិនស្គាល់អត្តសញ្ញាណ ។
ប្រភពដដែលបន្ដថា នៅមុនពេលកើតហេតុសាក្សីបានឃើញជនរងគ្រោះជិះម៉ូតូតាមបណ្ដោយផ្លូវជាតិលេខ១ ក្នុងទិសដៅពីអ្នកលឿងទៅភ្នំពេញ ។ លុះជិះមដល់ចំណុចកើតហេតុ ជនរងគ្រោះក៏បានបត់ឆ្លងផ្លូវពីឆ្វេងទៅស្ដាំ ខណៈនោះក៏មានរថយន្ដមួយគ្រឿងម៉ាក SSANG YONG ISTANA ធ្វើដំណើរពីភ្នំពេញទៅអ្នកលឿង ក៏បានបុកម៉ូតូជនរងគ្រោះពេញមួយទំហឹង បណ្ដាលឲ្យជនរងគ្រោះជាអ្នកជិះម៉ូតូស្លាប់ភ្លាមៗនៅកន្លែងកើតហេតុ ។ ចំពោះអ្នកបើកបររថយន្ដក្រោយពេលបុករួច បានបើករត់គេចខ្លួនរហូតដល់អ្នកលឿងទើបអ្នកបើកបររថយន្ដបានទុករថយន្ដចោល រួចរត់គេចខ្លួនបាត់ស្រមោល ។ ចំណែកសាកសពជនរងគ្រោះត្រូវបានសមត្ថកិច្ចជំនាញប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ។
ក្នុងករណីខាងលើនេះ សមត្ថកិច្ចជំនាញបានឲ្យដឹងថា គឺបណ្ដាលមកជនរងគ្រោះជាជិះម៉ូតូមានការធ្វេសប្រហែស ខ្ជីខ្ជា មិនប្រុងប្រយ័ត្នឲ្យបានគ្រប់ជ្រុងជ្រោយមុនពេលបើកឆ្លងកាត់ថ្នល់ ទើបបង្កឲ្យមានគ្រោះថ្នាក់ដល់ជីវិតបែបនេះ ៕ សហការី
