សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សមត្ថកិច្ចកងរាជអាវុធហត្ថខេត្តបាត់ដំបងសហការជាមួយអាវុធហត្ថរាជធានីភ្នំពេញ នៅព្រឹកថ្ងៃអង្គារ ២រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១ ខែឧសភា ឆ្នាំ២០១៨ ចាប់ខ្លួនស្ត្រីម្នាក់ពីបទចេញសែកគ្មានសាច់ប្រាក់ជាង១៤ម៉ឺនដុល្លារអាមេរិក នៅចំណុចបុរីវិមានភ្នំពេញ ខណ្ឌសែនសុខ ។
សមត្ថកិច្ច បង្ហើបឱ្យដឹងថា ស្ត្រីរូបនេះឈ្មោះ យុត ស្រីវន អាយុ៤២ឆ្នាំ មានទីលំនៅផ្ទះលេខ៧០ ក្រុមទី៥ សង្កាត់ចំការសំរោង ក្រុងបាត់ដំបង ខេត្តបាត់ដំបង ។
ការចាប់ខ្លួនស្ត្រីរូបនេះ គឺ ធ្វើតាមដីកាបង្គាប់ឱ្យចាប់ខ្លួនរបស់លោក ញូង ចន្ធី ចៅក្រមស៊ើបសួរសាលាដំបូងខេត្តបាត់ដំបង ត្រូវបានដាក់ឱ្យស្ថិតក្រោមការត្រួតពិនិត្យពីបទ”ចេញមូលប្បទានប័ត្រគ្មានសាច់ប្រាក់”ប្រព្រឹត្តនៅខេត្តបាត់ដំបង កាលពីថ្ងៃទី១៩ ខែកុម្ភះ ឆ្នាំ២០១៦ តាមមាត្រា២៣១ នៃច្បាប់ស្តីពីឧបករណ៍អាចជួញដូរបាននិងប្រតិបត្តិការទូទាត់សាច់ប្រាក់។
ការចាប់ខ្លួនស្ត្រីរូបនេះ គឺ ដោយសារជនត្រូវចោទតែងតែគេចវេះ មិនចូលបង្ហាញខ្លួនតាមដីការបស់តុលាការជាច្រើនលើក ។
បច្ចុប្បន្ន ស្ត្រីរូបនេះត្រូវបានបញ្ជូនទៅសាលាដំបូងខេត្តបាត់ដំបង ដើម្បីចាត់ការបន្តតាមនីតិវិធី ។ នៅដំណាក់កាលនេះ ចៅក្រមស៊ើបសួរ នឹងសម្រេចឃុំខ្លួនឬមិនឃុំខ្លួនជនត្រូវចោទ ៕ ចេស្តា
