សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: ប្រជាពលរដ្ឋឃាត់ខ្លួនជនសង្ស័យម្នាក់ ប្រគល់ឲ្យសមត្ថកិច្ច ក្រោយពេលធ្វើសកម្មភាពលួចម៉ូតូមួយគ្រឿង កាលពីជាងកន្លះខែមុន។ ការឃាត់ខ្លួននេះធ្វើឡើងកាលពីម៉ោង៧ និង៣០នាទីយប់ថ្ងៃសៅរ៍ ៦រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៥ ខែឧសភា ឆ្នាំ២០១៨ ចំណុចមុខក្លោងទ្វារវត្តញានរង្សី ផ្លូវបេតុង សង្កាត់ទួលសង្កែទី១ ខណ្ឌឫស្សីកែវ។
សមត្ថកិច្ចបានឲ្យដឹងថា សង្ស័យឈ្មោះ ភក្រ្ត័ សោភា អាយុ១៩ឆ្នាំ ស្នាក់នៅនិងមុខរបរមិនពិតប្រាកដ ជិះម៉ូតូម៉ាកយ៉ាម៉ាហាហ្វីណូ ពណ៌ខ្មៅអត់ស្លាកលេខ។ ចំណែកជនរងគ្រោះឈ្មោះ សោម ផានិត ភេទប្រុស អាយុ១៨ឆ្នាំ មុខរបរកម្មករស្នាក់នៅ ផ្ទះលេខ៤៣៣ ផ្លូវលំ ក្រុមទី៤ភូមិទួលសំពៅ សង្កាត់ទួលសង្កែទី១ ខណ្ឌឫស្សីកែវ ម៉ូតូដែលជនសង្ស័យលួចយកទៅបាត់នោះ ម៉ាកហុងដាឌ្រីម សេ១២៥ ស៊េរីឆ្នាំ២០០៩ ពណ៌ខ្មៅ ពាក់ស្លាកលេខកណ្តាល1D-6226។
ប្រភពពត៌មានពីសមត្ថកិច្ចបានឲ្យដឹងថា កាលពីព្រឹក ថ្ងៃទី១៥ខែមេសា ឆ្នាំ២០១៨ ជនរងគ្រោះបានមកលេងផ្ទះរបស់មិត្តភក្រ្ត័នៅចំណុចផ្ទះជួលក្រោយផ្សារជ័យជំនេះ ផ្លូវបេតុង ក្រុមទី១ ភូមិពោងពាយ សង្កាត់ទួលសង្កែទី២ ខណ្ឌឫស្សីកែវដោយបានទុកម៉ូតូនិងចាក់សោនៅមុខបន្ទប់ជួលរួចក៏ដើរចូលបន្ទប់ជួលដេកលេង រួមជនរងគ្រោះ ជនសង្ស័យ និងឈ្មោះផា(ត្រូវជាបងជីដូនមួយ របស់ជនរងគ្រោះ)លុះវេលាម៉ោង៩ព្រឹកថ្ងៃដដែលខណ:ជនរងគ្រោះភ្ញាក់ពីដំណេក រត់ចេញមកក្រៅបន្ទប់ ទើបដឹងថាបាត់ម៉ូតូបាត់ទាំងជនសង្ស័យខាងលើតែម្តង។
ប្រភពដដែលបានបន្ថែមថា លុះនៅវេលាម៉ោង៧និង៣០នាទី យប់ថ្ងៃទី៥ខែឧសភាឆ្នាំ២០១៨ ឈ្មោះ សោម សាវឿនអាយុ៣៨ឆ្នាំ មុខរបរសន្តិសុខឯកជន (ត្រូវជាពូរបស់ជនរងគ្រោះ) និង ឈ្មោះសោម រតនា(ត្រូវជាបងបង្កើតរបស់ជនរងគ្រោះ)បានឃើញជនសង្ស័យ ឈ្មោះភក្រ្គ័ សោភា កំពុងបណ្តើម៉ូតូមួយគ្រឿង ម៉ាកយ៉ាម៉ាហា អត់ស្លាកលេខ នៅចំណុចមុខក្លោងទ្វារវត្តញ្ញាណរង្សី ផ្លូវបេតុង ក៏បានឃាត់ខ្លួនបញ្ជូនមកប៉ុស្តិ៍នគរបាលរដ្ឋបាលទួលសង្កែទី២ ដើម្បីសួរនាំ។
បច្ចុប្បន្នជនសង្ស័យកំពុងឃាត់ខ្លួនបណ្តោះអាសន្ននៅប៉ុស្តិ៍នគរបាលរដ្ឋបាលទួលសង្កែទី២ ដើម្បីកសាងសំណុំរឿង បញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវិធី ៕ ជ្រោយពេជ្រ
