សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បង្គោលភ្លើងបំភ្លឺផ្លូវចំនួនមួយដើមបានបាក់ដួលរាបស្មើដល់ដីដោយសារតែបុរសម្នាក់ស្រវឹងបើករថយន្តក្នុងល្បឿនលឿន ហើយជ្រុលឡើងឃឿនបុក កាលពីវេលាម៉ោង៣ទៀបភ្លឺ ថ្ងៃព្រហស្បតិ៍ ១១រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១០ ខែឧសភា ឆ្នាំ២០១៨ នៅចំណុចមុខច្រកចូលផ្សារដីថ្មី ផ្លូវវេងស្រេង សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។
តាមសាក្សីនៅកន្លែងកើតហេតុបានឲ្យដឹងថា មុនពេលកើហេតុគេបានឃើញរថយន្តម៉ាកកាមរីគូទហើម ពណ៌សំបកឪឡឹក ពាក់ស្លាកលេខ ភ្នំពេញ2C 0409 បើកបរដោយបុរសម្នាក់ធ្វើដំណើរតាមបណ្តោយផ្លូវវេងស្រេង ក្នុងទិសដៅពីលិចទៅកើត ខណៈមកដល់ចំណុចកើតហេតុ ស្រាប់តែរេចង្កូតឡើងឃឿនផ្លូវបុកបង្គោលភ្លើងបាក់អស់ចំនួន១ដើម ដួលរាបស្មើដល់ដី ហើយរថយន្តបង្កបានព្យាយាមបើករត់ទាំងបែកកង់រហូតទៅដល់ចំណុចស្តុបលូប្រាំទើបទៅមុខលែងរួច ។
ក្រោយពេលកើតហេតុសមត្ថកិច្ចបានចុះមកដល់ចំណុចកើតហេតុ និងស្ទូចរថយន្តបង្កទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញដើម្បីដោះស្រាយតាមច្បាប់ ៕ សុខាសែនជ័យ
