សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ ស្រ្តីវ័យ៥៧ឆ្នាំម្នាក់ត្រូវបានចោរដាក់ថ្នាំសណ្តុំលួចយកមាសគ្រឿងទម្ងន់៤ដំឡឹង៧ជី និងលុយមួយចំនួន នៅវេលាម៉ោង ១១និង៣០នាទី កាលពីថ្ងៃពុធ ១០រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៩ ខែឧសភា ឆ្នាំ២០១៨ នៅលំនៅឋានរបស់ជនរងគ្រោះ ឈ្មោះ អៀម នី អាយុ៥៧ ឆ្នាំ សញ្ជាតិខ្មែរ នៅចំណុចខាងជើងឈាងខាងលិច សាលាបឋមសិក្សាស្ថានីយ ស្ថិតនៅភូមិចំការចេកខាងត្បូង សង្កាត់ ផ្ទះព្រៃ ក្រុងពោធិ៍សាត់ ។
មន្ត្រីនគរបាលប៉ុស្តិ៍រដ្ឋបាលសង្កាត់ផ្ទះព្រៃបានឲ្យដឹងថា ជនសង្ស័យត្រូវបានគេស្គាល់អត្តសញ្ញាណមានឈ្មោះ លី ចាន់ធី ភេទស្រី អាយុ ៥១ ឆ្នាំ បានមកស្នាក់នៅភូមិរ៉ា សង្កាត់ ផ្ទះព្រៃ ក្រុងពោធិ៍សាត់ មុខរបរមិនពិតប្រាកដ និងមានបក្ខពួកចំនួន ០២ នាក់ ប្រុស ម្នាក់ ស្រី ម្នាក់ បានធ្វើសកម្មភាពទៅបបួល ជនរងគ្រោះឈ្មោះ អៀម នី ដើម្បីមកលេងបៀរ ហើយក៏បានទិញបង្អែម១ ថង់ ផ្ញើឲ្យជនរងគ្រោះហូប ក្រោយពីពេលជនរងគ្រោះហូបបង្អែមនោះហើយ ក៏ត្រូវថ្នាំសណ្តំដេកស្តូកស្តឹងមិនដឹងខ្លួនបាត់ស្មារតី ។
ជនសង្ស័យឈ្មោះ លី ចាន់ធី នឹង បក្សពួកចាប់ផ្តើម ធ្វើសកម្មភាព រុះរើ ក្នុងបន្ទុប់ដេករបស់ជនរងគ្រោះ យកគ្រឿងអលង្ការមាសគ្រឿងសរុបចំនួន៤ ដំឡឹង៧ជី និងលុយមួយចំនួនដែលជនរងគ្រោះមិនបានចាំ ក្រោយពីធ្វើសកម្មភាពរួចហើយ ជនបង្ករបានរត់គេចខ្លួនចេញពីមូលដ្ឋានបាត់ ។ ជនរងគ្រោះត្រូវបានក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តពោធិ៍សាត់ ។
ករណីនេះ សមត្ថកិច្ចកំពុងស្រាវជ្រាវ ស្វែងរកចាប់ខ្លួនជនសង្ស័យដើម្បីរកយុត្តិធម៌ជូនជនរងគ្រោះ ៕ ប៉ឹម ពិន
