សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ សាកសពស្រ្តីវ័យចំណាស់ម្នាក់ត្រូវបានគេប្រទះឃើញនៅលើកំណាត់ផ្លូវជាតិលេខ៥ សង្ស័យជាករណីគ្រោះថ្នាក់ចរាចរណ៍នៅគ្រាដែលជនរងគ្រោះដើរឆ្លងថ្នល់កាលពីពាក់កណ្ដាលអធ្រាត្រ ដែលគេដឹងថា បង្កឡើងរថយន្តដោយ ១គ្រឿងមិនចាំម៉ាក ខណៈដែលរថយន្តបង្កបានបើករត់គេចបាត់ស្រម៉ោលទៅហើយនោះ។
ហេតុការណ៍ខាងលើបានបង្កការភ្ញាក់ផ្អើលឡើង កាលពីពាក់កណ្ដាលអធ្រាត្រថ្ងៃសុក្រ ១២រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១១ ខែឧសភា ឆ្នាំ២០១៨ នៅលើកំណាត់ផ្លូវជាតិលេខ៥ ត្រង់ចន្លោះបង្គោលគីឡូម៉ែត្រលេខ១៤១-១៤២ ស្ថិតក្នុងភូមិខ្សាច់ល្អិត ឃុំអន្សាចំបក់ ស្រុកក្រគរ ខេត្តពោធិ៍សាត់។
ប្រភពពីនគរបាលស្រុកក្រគេបានឲ្យដឹងថា ស្រ្តីវ័យចំណាស់រងគ្រោះ(ស្លាប់)ឈ្មោះ កែវ សុីតូ អាយុ ៦៥ឆ្នាំ ជនជាតិខ្មែរ រស់នៅភូមិ.ឃុំកើតហេតុខាងលើ ហើយការដែលគ្រោះថ្នាក់នេះនៅគ្រាដែលគាត់ដើរឆ្លងថ្នល់ពីជើងឆ្ពោះទៅទិសខាងត្បូង ក្នុងគោលបំណងទៅរាំធុងបាស់ទាំងសភាពស្រវឹងស្រាជោកជាំ លុះមកដល់ចំណុចកើតហេតុស្រាប់តែមានរថយន្តមិនចាំម៉ាក ១គ្រឿង កំពុងធ្វើចរាចរណ៍ក្នុងទិសដៅពីលិចឆ្ពោះទៅទិសខាងកើតបានជ្រុលបុកពេញទំហឹង រួចបន្ថែមល្បឿនទៅទិសខាងកើតបាត់ស្រម៉ោលតែម្តង។
ប្រភពដដែលបន្តទៀតថា មន្រ្តីជំនាញស្ថាប័នពាក់ព័ន្ធបានចុះស្រាវជ្រាវដល់កន្លែង ហើយបានធ្វើកំណត់ហេតុប្រគល់សាកសពជូនក្រុមគ្រួសារសាច់ញាតិត្រឹមត្រូវ ដើម្បីទទួលយកទៅចាត់ចែងធ្វើបុណ្យតាមប្រពៃណី ចំណែករថយន្តបង្ក(បើករត់គេច)កំពុងសហការគ្នាបន្កការស្រាវជ្រាវ៕ ប៉ឹម ពិន
