សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្តេចវិបុលសេនាភក្កី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីជូនភ្លើងបូជាសពឯកឧត្តម អៀវ បណ្ណាការ អតីតសមាជិកព្រឹទ្ធសភា ដោយមានថ្នាក់ដឹកនាំ សមាជិក សមាជិកាព្រឹទ្ធសភា រដ្ឋសភា រាជរដ្ឋាភិបាល មន្រ្តីរាជការ និងបងប្អូនញាតិមិត្តជិតឆ្ងាយនៃក្រុមគ្រួសារសពជាច្រើននាក់ ចូលរួមផ្តល់ជាកិត្តិយសចុងក្រោយ នៅថ្ងៃអង្គារទី១៥ ខែឧសភា ឆ្នាំ២០១៨ នៅឈានបដ្ឋានវត្តទួលសុភាឃួន ស្ថិតនៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ក្នុងឱកាសដ៏សែនក្រៀមក្រំនោះ លោក ប៉ុក វណ្ណធីរ ទីប្រឹក្សាក្រសួងធម្មការ និងសាសនា បានឡើងអានវិយោគថា និងប្រវត្តិរបស់លោក អៀវ បណ្ណាការ ។ បន្ទាប់ពីសម្តេចវិបុលសេនាភក្កី សាយ ឈុំ ប្រធានព្រឹទ្ធសភា ជូនភ្លើងបូជាសពរួចមកលោកជំទាវ អៀវ បណ្ណារី តំណាងក្រុមគ្រួសារសពឡើងថ្លែងអំណរគុណដល់ភ្ញៀវកិត្តិយសទាំងអស់ដែលចូលរួមក្នុងពិធីបុណ្យ និងពិធីបូជាសព ។
លោក អៀវ បណ្ណាការ អតីតសមាជិកព្រឹទ្ធសភា បានទទួលមរណភាព កាលពីថ្ងៃព្រហសត្បតិ៍ ១១រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១០ ខែឧសភា ឆ្នាំ២០១៨ វេលាម៉ោង២០:៥០នាទីយប់ ក្នុងជន្មាយុ៨៧ឆ្នាំ ដោយជរាពាធ។ សពលោក អៀវ បណ្ណាការ ត្រូវបានតម្កល់ធ្វើបុណ្យទក្ខិណានុប្បទាន តាមប្រពៃណីសាសនា នៅគេហដ្ឋានលេខ១៩៣៦ ផ្លូវលេខ១១០H ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ៕ ស រស្មី
