រថយន្តព្រូសសាកកម្លាំងជាមួយដើមក្ងោក មានអីខ្ទេចមុខខ្លួនឯង ហើយបង្កឲ្យមនុស្សរបួសធ្ងន់ស្រាល៣នាក់ទៀត

ភ្នំពេញ៖ បុរស៣នាក់ត្រូវបានរថយន្តសាមុយដឹកយកទៅសង្គ្រោះនៅឯមន្ទីពេទ្យភ្លាមៗ ក្រោយពីបើករថយន្តព្រូសមួយគ្រឿងយ៉ាងលឿន ហើយរេចង្កូតជ្រុលទៅបុកដើមក្ងោកនៅចញ្ចើមផ្លូវពេញទំហឹង កាលពីវេលាម៉ោង ០៣ និង១០នាទីរំលងអធ្រាត្រ ឈានចូលថ្ងៃសៅរ៍ ៥កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៩ ខែឧសភា ឆ្នាំ២០១៨ នៅត្រង់ចំណុចមុខវិទ្យាល័យជាស៊ីមសាមគ្គី តាមបណ្តោយផ្លូវ ២៧១ ស្ថិតក្នុងសង្កាត់ ស្ទឹងមានជ័យទី ១ ខណ្ឌ មានជ័យ រាជធានីភ្នំពេញ ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរស៣នាក់ជិះរថយន្តម៉ាកព្រូសមួយគ្រឿងពណ៌ស មិនមានស្លាកលេខ(រថយន្តថ្មីទើបទិញ) បានធ្វើដំណើរតាមបណ្ដោយផ្លូវលេខ២៧១ ទិសដៅពីជើងទៅត្បូង ក្នុងល្បឿនយ៉ាងលឿន ខណៈមកដល់ចំណុចកើតហេតុ បានរេចង្កូតទៅបុកដើមក្ងោកមួយដើមយ៉ាងពេញទំហឹងបណ្តាលឲ្យបុរសម្នាក់រងរបួសធ្ងន់ នឹង២នាក់ទៀតសន្លប់ស្ដូកមួយដង្ហើមចង្រិត(រងរបួសស្រាល) តែត្រូវរថយន្តសាម៉ុយដឹកយកទៅសង្គ្រោះនៅឯមន្ទីពេទ្យភ្លាមៗ រីឯរថយន្តបង្កវិញ បានរងការខូចខាតផ្នែកខាងមុខយ៉ាងដំណំ ដោយដើមក្ងោកគ្រាន់តែរលាត់សំបកតិចតួចតែប៉ុណ្ណោះ ។

ក្រោយពេលកើតហេតុសម្ថកិច្ចជំនាញក៏បានមកដល់កន្លែងកើតហេតុធ្វើការវាស់វែងយករថយន្តទៅរក្សាទុកនៅការិយាល័យចរាចរណ៏ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំដោះស្រាយទៅតាមច្បាប់ ៕ ភារ៉ា ដង្កោ