សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: ការិយាល័យបទល្មើស ព្រហ្មទណ្ឌ កងរាជអាវុធហត្ថរាជធានីភ្នំពេញ នៅព្រឹកថ្ងៃអង្គារ ៨កើត ខែជេស្ឋ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២២ ខែឧសភា ឆ្នាំ២០១៨ បានកសាងសំណុំរឿងបញ្ជូនចោរឆក់២នាក់ទៅតុលាការ បន្ទាប់ពីកម្លាំងល្បាត មូលដ្ឋានកងរាជអាវុធហត្ថខណ្ឌដូនពេញឃាត់ខ្លួនបាន នៅចំណុចផ្លូវលេខ៥១ កែងផ្លូវ១០៨ សង្កាត់វត្តភ្នំ ខណ្ឌដូនពេញ ។
មន្រ្តីកងរាជអាវុធហត្ថរាជធានីភ្នំពេញបានឲ្យដឹងថា ជនសង្ស័យ០២នាក់ ១-ឈ្មោះ ធឹម បូរ៉ាណ ហៅបារាំង អាយុ១៨ឆ្នាំ ២-ឈ្មោះ សុខ វណ្ណ:ច័ន្ទភារុន អាយុ១៨ឆ្នាំ រួមនឹងបក្ខពួក០២នាក់ទៀត ឈ្មោះ ស្កាយ និងឈ្មោះ រ៉ុង បានធ្វើសកម្មភាពឆក់កាបូបស្ពាយពីជនរងគ្រោះ ឈ្មោះ អែល សំណាង កាលពីថ្ងៃទី១៨ ខែឧសភា ឆ្នាំ២០១៨ ម៉ោងជាង៤រសៀល ខណ:ដែលជនរងគ្រោះកំពុងដើរហាត់ប្រាណ ធ្វើឲ្យភ្ញាក់ផ្អើលដល់កម្លាំងល្បាតអាវុធហត្ថខណ្ឌដូនពេញ ប្រដេញ និងឃាត់ខ្លួនបានជនសង្ស័យ០២នាក់ រួមជាមួយម៉ូតូ០១គ្រឿង ម៉ាក ហុងដាសេ១២៥ ពណ៌ខ្មៅ ស្លាកលេខ ភ្នំពេញ 1GL-5480 និងដកហូត កាបូបស្ពាយមួយមានទូរស័ព្ទចំនួន០៣គ្រឿង ប្រគល់ជូនជនរងគ្រោះវិញ។
តាមជំនាញរបស់កងរាជអាវុធហត្ថរាជធានីភ្នំពេញ ជនសង្ស័យបានសារភាពថា នៅថ្ងៃកើតហេតុពួកគេមានគ្នា០៤នាក់ ជិះម៉ូតូ០២គ្រឿង បានធ្វើដំណើរតាមដងផ្លូវដើម្បីរកឱកាសឆក់វត្ថុមានតម្លៃផ្សេងៗ ក្នុងរាជធានីភ្នំពេញ លុះដល់ចំណុចកើតហេតុច ស្រាប់តែឃើញស្ត្រី០២នាក់ដើរឆ្លងផ្លូវ ហើយ ស្ត្រីម្នាក់មានស្ពាយកាបូប ឃើញដូចនោះពួកខ្លួនក៏ជិះម៉ូតូទៅក្បែរ រួចក៏ធ្វើសកម្មភាពឆក់យកកាបូបនោះ បានសម្រេចជិះគេចខ្លួន ស្រាប់តែជនរងគ្រោះបានស្រែកឆោរឡោ ធ្វើឲ្យភ្ញាក់ផ្អើលដល់កម្លាំងល្បាតអាវុធហត្ថខណ្ឌដូនពេញ ប្រដេញ និងឃាត់ខ្លួនបាន០២នាក់ រួមជាមួយម៉ូតូ០១គ្រឿង ឯបក្ខពួក០២នាក់ទៀត បានជិះគេចខ្លួនបាត់។
ជនសង្ស័យដែលកម្លាំងអាវុធហត្ថឃាត់ខ្លួនបាន បានសារភាពបន្ថែមថា ដោយរយ:កាលប្រហែល០៦ខែ កន្លងមកនេះពួកគេបានជាប់ប្រើប្រាស់គ្រឿងញៀន ហើយពុំមានលុយទិញថ្នាំញៀនជក់តាមតម្រូវការ ទើប ពួកគេចេញធ្វើសកម្មភាពឆក់វត្ថុមានតម្លៃពីជនរងគ្រោះតាមដងផ្លូវ ក្នុងភូមិសាស្ត្ររាជធានីភ្នំពេញ ដោយ ពួកគេធ្វើសកម្មភាពឆក់បានសម្រេច ប្រមាណ១៥លើកមកហើយ ទើបតែលើកទី១៦នេះ ក៏ត្រូវសមត្ថកិច្ចអាវុធហត្ថឃាត់ខ្លួនបានតែម្តង។
បច្ចុប្បន្ន ជនសង្ស័យទាំង២នាក់ខាងលើ ត្រូវបានសមត្ថកិច្ចជំនាញនៃការិយាល័យបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ កសាងសំណុំរឿងបញ្ជូនទៅតុលាការ ដើម្បីផ្តន្ទាទាសតាមនីតិវិធីច្បាប់ ឯជនសង្ស័យ០២នាក់ទៀត ឈ្មោះ ស្កាយ និងឈ្មោះ រ៉ុង សមត្ថកិច្ចកំពុងស្រាវជ្រាវស្វែងរក ចាប់ខ្លួន ៕ ជ្រោយពេជ្រ
