រថយន្តធុនធំបុកគ្នាជាមួយម៉ូតូធំ បណ្ដាលឲ្យបុរសម្នាក់ស្លាប់

ភ្នំពេញ៖ ហេតុការណ៍គ្រោះថ្នាក់ចរាចរណ៍មួយបានកើតឡើងរវាងរថយន្តនិងម៉ូតូ បណ្ដាលឲ្យបុរសម្នាក់ស្លាប់យ៉ាងអាណោចអាធម៍នៅកន្លែង រួចអ្នកបើករថយន្តបង្ករត់គេចខ្លួនបាត់ ។

ករណីគ្រោះថ្នាក់ចរាចរនេះ បានកើតឡើងកាលពីវេលាម៉ោង៤និង៥០នាទីទៀបភ្លឺ ថ្ងៃសៅរ៍ ១២កើត ខែជេស្ឋ ឆ្នាំច សំរិទ្ធស័ក ព.ស២៥៦២ ត្រូវនឹងថ្ងៃទី២៦ ខែឧសភា ឆ្នាំ២០១៨ នៅតាមបណ្តោយផ្លូវ២០០៤ ក្នុងភូមិរលា សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ។

ជនរងគ្រោះមានឈ្មោះ វ៉ាន់ រ៉ាដេត ភេទប្រុស អាយុ២៧ឆ្នាំ ស្នាក់នៅផ្ទះលេខ៣ ផ្លូវលេខ៦១០ ភូមិ២១ សង្កាត់បឹងកក់២ ខណ្ឌទួលគោក ជិះម៉ូតូម៉ាក FZ ពាក់ស្លាកលេខ ភ្នំពេញ1CA-8398 ។ ចំណែករថយន្តបង្កធុនធំ ពាក់ស្លាកលេខ ភ្នំពេញ 3D-8661 ភ្លាមនោះអ្នកបើកបររត់គេចខ្លួនបាត់ ដោយបន្សល់ទុករថយន្តនៅកន្លែងកើតហេតុ ។

ក្រោយពេលកើតហេតុ សមត្ថកិច្ចជំនាញចុះទៅដល់កន្លែងកើតហេតុ នឹងធ្វើការវាស់វែង រួចយកម៉ូតូនិងរថយន្តទៅរក្សាទុកនៅការិយាល័យនគរបាលចរាចរណ៍ផ្លូវគោករាជធានីភ្នំពេញចាត់ការតាមច្បាប់ ចំណែកសាកសពត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕ ស តារា