សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ នគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តបន្ទាយមានជ័យ បានចេញប្រតិបត្តិការបង្រ្កាបការធ្វើជំនួញសត្វព្រៃឆ្លងដែនខុសច្បាប់ ប្រភេទ២ប្រភេទគឺសត្វអន្សង និងសត្វអណ្តើកសរុប៧២១គីឡូក្រាមខណៈដែលឈ្មួញនាំចេញពីប្រទេសថៃចូលមកកម្ពុជាឆ្លងកាត់ច្រករបៀង ក្នុងភូមិសាស្រ្តឃុំអូរស្រឡៅ ស្រុកម៉ាឡៃ ខេត្តបន្ទាយមានជ័យ និងឃាត់ខ្លួនអ្នកបើករថយន្ត០១នាក់ ។ បទល្មើសឆ្លងដែនសត្វព្រៃត្រូវបានប្រទេសទាំង១០នៃសមាជិកអាស៊ាន ចាត់ទុកថាជាបទល្មើសឧក្រិដ្ឋកម្មឆ្លងដែនខុសច្បាប់ ។
ការបង្រ្កាបកម្លាំងនគរបាលធ្វើឡើង កាលពីវេលាម៉ោង៩ និង៣០នាទីយប់ ថ្ងៃអាទិត្យ ១៣កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៧ ខែឧសភា ឆ្នាំ២០១៨ នៅលើកំណាត់ផ្លូវជាតិលេខ៥៩ ភូមិថ្មី ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ។ រថយន្ត និងសត្វព្រៃត្រូវបានបញ្ជូនមកកាន់ស្នងការដ្ឋាននគរបាលខេត្តបន្ទាយមានជ័យនៅព្រឹកថ្ងៃទី២៨ ខែឧសភា សមត្ថកិច្ចនគរបាល មន្រ្តីអង្គភាពជំនាញរដ្ឋបាលព្រៃឈើ ត្រួតពិនិត្យជាក់ស្តែង ដែលមានការចូលរួមពីព្រះរាជអាជ្ញារងអមសាលាដំបូងខេត្តបន្ទាយមានជ័យ លោក តេង សាម៉ៃ និង ស្នងការរងទទួលផែនប្រឆាំងបទល្មើស លោកឧត្តមសេនីយ៍ត្រី ចាប សុផាប្ញទ្ធិ ពិនិត្យឃើញសត្វអន្សងមានចំនួន៧០ក្បាល ស្មើ និងទម្ងន់៣៥១គីឡូក្រាម និងសត្វអណ្តើក៦១៨ក្បាលស្មើ និងទម្ងន់៤០៦គីឡូក្រាម ។
ស្នងការរងទទួលផែនប្រឆាំងបទល្មើស លោកឧត្តមសេនីយ៍ត្រី ចាប សុផាប្ញទ្ធិ បានប្រាប់ឲ្យដឹងថា កម្លាំងនគរបាលប្រឆាំងបទល្មើសសេដ្ឋកិច្ចអនុវត្តតាមបទបញ្ជារបស់លោកឧត្តមសេនីយ៍ទោ អាត់ ខែម ស្នងការនគរបាលខេត្ត តាមខ្លឹមសារនៃកិច្ចប្រជុំប្រចាំខែកន្លងទៅថ្មីៗបានជម្រុញឲ្យកម្លាំងនគរបាលការិយាល័យជំនាញត្រូវពង្រឹងនៃការចុះត្រួតពិនិត្យបង្ការទប់ស្កាត់ និងបង្រ្កាបបទល្មើសឆ្លងដែនខុសច្បាប់គ្រប់ប្រភេទដើម្បីចូលរួមនៃការរក្សាសន្តិសុខ សណ្តាប់ ធ្នាប់ និងការចូលរួមនៃការប្រមូលពន្ធចូលរដ្ឋតាមរយៈនៃវិធានការចំពោះក្រុមឈ្មួញរត់ពន្ធទំនិញតាមច្រករបៀងខុសច្បាប់ជាដើមនោះ ។
លោកស្នងការរងបានឲ្យដឹងទៀតថា បើតាមចម្លើយសារភាពរបស់អ្នកបើករថយន្តមានឈ្មោះ សោម កែវ ភេទប្រុស អាយុ២៤ឆ្នាំ រស់នៅភូមិវាលហាត់ ឃុំម៉ាឡៃ ស្រុកម៉ាឡៃ ឲ្យដឹងថារូបគេគ្រាន់តែស៊ីឈ្នួលបើករថយន្តដឹកសត្វព្រៃទាំងនោះឲ្យឈ្មោះ ជីម និងឈ្មោះ ភ័ណ នៅភូមិបឹងបេង ឃុំបឹងបេង ស្រុកម៉ាឡៃ ឈ្មួល១ជើង១០ម៉ឺនរៀល ការដឹកសត្វព្រៃឆ្លងដែនមានរយៈពេល១ឆ្នាំមកហើយ ។ ដឹកចេញពីច្រករបៀងជិតវត្តឡងខង ,ច្រករបៀងអរប៉ នៅជិតវត្ត៩៣ និងច្រករបៀងជិតរោងវែង ។
លោកស្នងការរងបានបញ្ជាក់ឲ្យដឹងទៀតថា ក្រោយពីសមត្ថកិច្ចធ្វើការត្រួតពិនិត្យជាក់ ស្តែងសត្វព្រៃទាំង២ប្រភេទនោះហើយ សមត្ថកិច្ចនគរបាលក៏បានប្រគល់មន្រ្តីរដ្ឋបាលព្រៃឈើខេត្តដើម្បីយកចាត់ចែងប្រលែងចោលកន្លែងមានសុវត្ថិភាព ចំណែកអ្នកបើករថយន្ត និងរថយន្តបំរើការដឹកជញ្ជូនបទល្មើស និងបញ្ជូនទៅតុលាការចាត់ការតាមផ្លូវច្បាប់៕ សំ វិច្ឆិកា
