សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តCRVមួយគ្រឿង បានបើកលឿនជ្រុលទៅបុកចំហៀងគូទរថយន្តឡិចស៊ីស បណ្តាលឲ្យរថយន្តឡិចស៊ីសបួងចង្កូតទៅបុកជញ្ជាំងហាងម៉ាស្សា ហ្វេប៊្សុឡឹស ធ្លុះពីម្ខាងទៅម្ខាង រងការខូចខាតយ៉ាងដំណំ រួចហើយរថយន្តបង្កបើកគេចខ្លួនបាត់ ។
ហេតុការណ៍គ្រោះថ្នាក់ចរចរណ៍ខាងលើនេះ បានកើតឡើងនៅវេលាម៉ោង០២ និង០០នាទីរំលងអធ្រាត្រឈានចូលថ្ងៃសៅរ៍ ៤រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២ ខែមិថុនា ឆ្នាំ២០១៨ នៅចំណុចហាងម៉ាស្សា ហ្វេប៊្សុឡឹស តាមបណ្តោយផ្លូវ ៣១០ កែងផ្លូវ ៦៣ ស្ថិតក្នុងសង្កាត់ បឹងកេងកងទី១ ខណ្ឌចំការមន រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តម៉ាក CRV មួយគ្រឿង ពណ៌ទឹកបិច មិនចាំស្លាកលេខ បើកបរដោយជនជាតិបរទេស ធ្វើដំណើរតាមបណ្តោយផ្លូវលេខ៦៣ ទិសដៅពីត្បូងទៅជើងក្នុងល្បឿនលឿន លុះមកដល់ផ្លូវបំបែកជាបួនមិនបង្អន់ល្បឿន ស្រាប់តែមានរថយន្តម៉ាក ឡិចស៊ីសRX-300 ពណ៌ស្ក ពាក់ស្លាកលេខ ភ្នំពេញ 2H-8103 បានធ្វើដំណើរតាមបណ្តោយផ្លូវ៣១០ ទិសដៅពីកើតទៅលិចក្នុងល្បឿនលឿនដូចគ្នា ហើយក៏ត្រូវបានរថយន្តCRVបុកចំគូទរថយន្តឡិចស៊ីស បណ្ដាលឲ្យរថយន្តឡិចស៊ីស រេចង្កូតទៅបុកចូលហាងម៉ាស្សា ហ្វេសប៊្សុឡឺស បណ្តាលឲ្យបែកកញ្ចក់ និងជញ្ជឹងរងការខូចខាតយ៉ាងដំណំ រីឯរថយន្តឡិចស៊ីសវិញ ក៏រងការខូចខាតផ្នែកខាងមុខស្ទើរតែទាំងស្រុង ដោយបានផ្ទុះពោងសុវត្ថិភាពចំនួន២ រួមទាំងបង្កឲ្យអ្នកបើកបរ និងអ្នករួមដំណើរជាមួយរងរបួសធ្ងន់ស្រាល២នាក់ ។ ភ្លាមៗនោះរថយន្តបង្កម៉ាក CRV បានបើកគេចខ្លួនបាត់ស្រមោលតែម្ដង ។
ក្រោយពេលកើតហេតុ ជនរងគ្រោះភាគីខាងរថយន្តឡិចស៊ីសដែលរបួសធ្ងន់ស្រាល ត្រូវបានរថយន្តសាមុយដឹកយកទៅសង្គ្រោះនៅឯមន្ទីរពេទ្យ ។ បន្ទាប់មកសម្ថកិច្ចមូលដ្ឋានបានចុះមកដល់កន្លែងកើតហេតុ ហើយដោយសារតែភាគីខាងរថយន្តឡិចស៊ីស មិននៅកន្លែងកើតហេតុ ក៏បានទំនាក់ទំនងទៅសមត្ថកិច្ចជំនាញ ចុះមកវាស់វែង និងស្ទូចយករថយន្តទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំដោះស្រាយទៅតាមក្រោយ ៕ ភារ៉ា ដង្កោ
