សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តកុងទីន័របើកជែងឡើងឃឿនផ្លូវបុកបង្គោលភ្លើង និងអូសរបើកការ៉ូឡា តាមបណ្តោយផ្លូវវេងស្រេង ស្ថិតក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ កាលពីវេលាម៉ោង ១០នឹង១៥នាទីយប់ ថ្ងៃអាទិត្យ ៥រោច ខែជេស្ឋ ឆ្នាំច សំរឹទ្ធិស័ក្តិ ព.ស. ២៥៦២ ត្រូវនឹងថ្ងៃទី៣ ខែមិថុនា ឆ្នាំ២០១៨ ។
ប្រភពព័ត៌មានជុំវិញកន្លែងកើតហេតុបានឲ្យដឹងថា រថយន្តកុងទីន័រ ពណ៌ សលាយខៀវ ពាក់ស្លាកលេខព្រះសុីហនុ 3A 3666 ខាងលើបានបើកតាមបណ្តោយផ្លូវវេងស្រេង ពីកើតទៅលិចក្នុងល្បឿនយ៉ាងលឿន ហើយបានជែងរថយន្តមួយគ្រឿងទៀត តែបែរជារេចង្កូតឡើងលើឃឿនផ្លូវ បុកស្លាកសញ្ញាចរាចរណ៍ និងបង្គោលភ្លើងបំភ្លឺផ្លូវបាក់ ហើយអូសការ៉ូឡារប៊ើកខ្ទេចខ្ទី តែមិនបង្កគ្រោះថ្នាក់ដល់អ្នកដទៃ ។
ក្រោយកើតហេតុអ្នកបើករថយន្តបង្កគេចខ្លួនបាត់ ហើយសមត្ថកិច្ចមូលដ្ឋានបានទំនាក់ទំនងជំនាញ មកធ្វើការវាស់វែង យករថយន្តទៅរក្សាទុកនៅការិយាល័យចរាចរណ៍រាជធានីភ្នំពេញ រង់ចាំដោះស្រាយនៅពេលក្រោយ ៕ សុខាសែនជ័យ
