សារព័ត៌មាន នគរវត្ត តែងតែនាំមុខគេជានិច្ច
ប្រជាពលរដ្ឋនៅជិតភ្នំបុរី ស្ថិតក្នុងស្រុកអង្គរបុរី ខេត្តតាកែវបានឲ្យដឹងថា សព្វថ្ងៃនេះសកម្មភាពនៃការជីកកកាយយកដី និងថ្មភ្នំបាននិងកំពុងកើតឡើងយ៉ាងគគ្រឹកគគ្រេង ។ មន្ត្រីថ្នាក់ស្រុកអង្គរបុរីត្រូវប្រជាពលរដ្ឋរាយការណ៍ថា ជាអ្នកដែលទទួលបានផលប្រយោជន៍ក្នុងការកម្ទេចភ្នំនេះ ។ ប្រជាពលរដ្ឋនៅតំបន់នោះអះអាងថា ក្នុងមួយថ្ងៃៗ រថយន្តដឹកដី ដឹកថ្មរាប់សិបគ្រឿងបានដឹកជញ្ជូនដី និងថ្មចេញពីភ្នំនេះ ។
គេរាយការណ៍ថា លោក ឌឿ ជា អភិបាលរងស្រុកអង្គរបុរីបានកំណត់ឲ្យរថយន្តដឹកថ្ម ដឹកដីបង់ប្រាក់ឲ្យខ្លួនក្នុងមួយជើង៧ពាន់រៀល ។ រថយន្តខ្លះក្នុងមួយថ្ងៃដឹកបាន១០ជើង ខ្លះ២០ជើង តាមទីជិតទីឆ្ងាយ ។ នៅក្នុងចំណោមរថយន្តរាប់សិបគ្រឿងនោះ គេប៉ាន់ប្រមាណថា មិនតិចជាង១០០ជើងទេ ដែលដីភ្នំ ឬថ្មភ្នំត្រូវបានដឹកចេញពីភ្នំបុរីនេះ ។ ដូច្នេះ លោកអភិបាលរងស្រុកក៏អាចរកចំណូលបានច្រើនគួរសមពីការចាំដកតុងពីរថយន្តដឹកថ្ម ដឹកដីទាំងនោះ ។ រឿងលោក ឌឿ ជា យកលុយពីរថយន្តដឹកថ្ម ដឹកដី កាយចេញពីភ្នំបុរីនេះ ប្រជាពលរដ្ឋរស់នៅជើងភ្នំនេះ សុទ្ធតែដឹងគ្រប់ៗគ្នា ។
នៅឯសាលាស្រុកអង្គរបុរីឯណោះវិញ ក៏មានមន្ត្រីមួយចំនួនខ្សឹបខ្សៀវពីបញ្ហាផលប្រយោជន៍ដែលបានមកពីការយកលុយពីរថយន្តដឹកថ្ម ដឹកដីនេះដែរ ។ ផលប្រយោជន៍ដែលមិនត្រូវបានចែករំលែកឲ្យគ្នាបានរស់នោះគឺជាមូលហេតុ ដែលនាំឲ្យព័ត៌មានស្តីអំពីការជីកកកាយដីភ្នំបុរី ត្រូវបែកធ្លាយ ។ គេនិយាយថា មានតែលោកអភិបាលស្រុក និងអភិបាលរងឌឿ ជា ប៉ុណ្ណោះ ដែលទទួលបានផលប្រយោជន៍ពីដំណើរឆ្ពោះទៅរកការរលាយបាត់បង់ភ្នំប្រវត្តិសាស្ត្រមួយនេះ ។ ប្រជាពលរដ្ឋ រស់នៅក្បែរៗភ្នំបុរី ស្ថិតក្នុងស្រុកអង្គរបុរី រំពឹងថា ថ្នាក់ដឹកនាំខេត្តតាកែវ នឹងពិនិត្យមើលរឿងនេះឡើងវិញ ៕
