សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្ដឡិចស៊ីសRX300 បើកបរដោយជនជាតិចិនក្នុងល្បឿនលឿនមិនប្រយ័ត្នត្រង់ផ្លូវបំបែកជា៣ ធ្វើឲ្យយុវជន២នាក់ជិះម៉ូតូមកបុកចំពីហៀងបណ្ដាលឲ្យរងរបួសធ្ងន់ម្នាក់ ស្រាលម្នាក់ កាលពីវេលាម៉ោង១០ និង៣០នាទីព្រឹក ថ្ងៃចន្ទ ១៣រោច ខែជេស្ឋ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១១ ខែមិថុនា ឆ្នាំ២០១ នៅចំណុចបុរីពិភពថ្មី២ ផ្លូវ៦ ភូមិដីថ្មី សង្កាត់ដង្កោ ខណ្ឌដង្កោ រាជធានីភ្នំពេញ ។
សមត្ថកិច្ចមូលដ្ឋានបានប្រាប់ឲ្យដឹងថា ជនរងគ្រោះទាំង២នាក់ទី១ឈ្មោះ ពុំ សុណាង អាយុ១៩ ឆ្នាំមុខរបរជាសិស្ស និងទី២ឈ្មោះ ហៀង នុន អាយុ២១ឆ្នាំមុខរបរជាសិស្ស អ្នកទាំង២នាក់ត្រូវជាបងប្អូនគ្នាស្នាក់នៅភូមិបាគូ សង្កាត់ដង្កោ ខណ្ឌដង្កោ ។
យោងតាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា មុនពេលកើតហេតុគេបានឃើញរថយន្ដមួយគ្រឿងម៉ាក ឡិចស៊ីសRx300ពណ៌ស្ករ ដែលពាក់ស្លាកលេខភ្នំពេញ2AP-1165 ដែលបើកបរដោយជនជាតិចិនក្នុងល្បឿនលឿនទិសដៅពីលិចមកកើត លុះមកដល់ចំណុចកើតហេតុផ្លូវបំបែកជា៣ក៏មានម៉ូតូមួយគ្រឿងម៉ាក Zoomer x ពណ៌ស លាយលឿង ដែលពាក់ស្លាកលេខភ្នំពេញ1DQ-3497 ជិះដោយយុវជន២នាក់ក្នុងទិសដៅពីត្បូងមកជើងមិនប្រយ័ត្នដូចគ្នា ក៏ជ្រុលចង្កូតទៅបុករថយន្ដជនជាតិចិនដែលកំពុងបើកលឿន ពេញទំហឹងបណ្ដាលអឲឲ្យដួលរងរបួសធ្ងន់ ស្រាលទាំង២នាក់តែម្ដង ។ ភ្លាមៗនោះជនរងគ្រោះទាំង២នាក់ត្រូវបានរថយន្ដសង្គ្រោះបន្ទាន់សួគ៌ាដឹកមកជួយសង្គ្រោះ ។
ក្រោយពេលកើតហេតុសមត្ថកិច្ចបានចុះមកដល់កន្លែងកើតហេតុបានវាស់វែងយកម៉ូតូនិងរថយន្ដទៅរក្សាទុកនៅអធិការដ្ឋាននគរបាលខណ្ឌដង្កោ រងចាំដោះស្រាយគ្នាពេលក្រោយតាមនីតិវិធី ៕ដោយ៖ ភារ៉ា ដង្កោ
